ყველას გემახსოვრებათ ებრაელი "ბანკირი" შეილოკი "ვენეციელი ვაჭარიდან", კაცი, რომელიც ფულის მსესხებელს, თუკი მან ვალი ვერ დააბრუნა, ერთ გირვანქა ხორცის ნაჭერს, ანუ გულს სთხოვს ვალის დასაფარავად.

ამ პიესის ალეგორია პირდაპირი მინიშნებაა იმაზე, რომ ეკონომიკის წითელი ხაზი ადამიანის გულზე გადის.
საქართველოს 600 000 მოქალაქეს, რომლებიც ე.წ. ურჩ გადამხდელებად, პრობლემურ მსესხებლებად ითვლებოდნენ, საბანკო ვალებისგან გული საგულეს აღარ ედოთ, საქართველოს მთავრობამ და `ქართუ ბანკმა~ ბანკირების ხელში ჩავარდნილებს ვალი სრულად გაუნულა.
მთავრობის გადაწყვეტილებით, ჭარბვალიანობის შემცირების მიზნით, მოსახლეობის გარკვეული კონტინგენტისთვის ვალების ჩამოწერა მოხდა.
გაიხსნა სპეციალური საიტი _ vali.ge, სადაც ნებისმიერ ადამიანს შეუძლია ნახოს, არის თუ არა სიაში თავისი სახელი და გვარი და ჩამოეწერა თუ არა წლების განმავლობაში დაგროვილი დავალიანება.

გაჩნდა უამრავი მადლიერი ადამიანი, რომლებიც ვალის გარეშე შეხვდებიან ახალ წელს.
ოფიციალურად გამოცხადდა, რომ ვალები სხვადასხვა ბანკებიდან 600 000-ზე მეტ ადამიანს გაუნულდა.
პროფესორ ლია ელიავას აზრით, მიუხედავად ამ დიდი ფინანსური აქტისა და მადლიერი 600 000 ადამიანისა, მოსახლეობის გარკვეული ნაწილი უკმაყოფილო დარჩა, ანუ მოსახლეობის ის ნაწილი, ვინაც შეძლებისდაგვარად, გაჭირვების მიუხედავად, ბანკებიდან აღებულ სესხებს პატიოსნად იხდიდა, მას ეს საფინანსო შემოწირულობა არ შეხებია.

ლია ელიავა: "ვინც იხდიდა, მას შეღავათიც არ შეეხება, ხოლო ვინც საერთოდ არ იხდიდა, ვალი გაუნულდა.
საინტეერსოა, რომ ასეთი იყო ხელისუფლების გადაწყვეტილება, რამაც ძალიან ბევრი ადამიანის უკმაყოფილება გამოიწვია, იმათი, ვინც ეკონომიკური პრობლემების მიუხედავად, თავიანთ საკრედიტო დავალიანებას პატიოსნად იხდიდა. როცა მოსახლეობა ხედავს, რომ პირმა, რომელმაც აიღო სესხი ბანკიდან, "შეჭამა". უპასუხისმგებლოდ არ აბრუნებს და ბოლოს ეს სესხი უნულდება, გული წყდება, სწყინს. ეს იწვევს საზოგადოების შუაზე გახლეჩას. არ შეიძლება ცალი ხელით ერთი გაახარო და მეორე, იმის გამო, რომ კეთილსინდისიერია _ დაჩაგრო.

მოკლედ, ვალების განულების პროცესი ტექნიკურად სწორი პროცესი იყო, მაგრამ მორალურად გაუმართლებელი. ნაწილი ადამიანებისა კმაყოფილია, ნაწილი უკმაყოფილო და ნაწყენი და უნდა ითქვას, რომ ადამიანების გულში წყენა რჩება და ამ წყენის გაქრობა აღარაა ადვილი. მეტსაც გეტყვით, სამეგრელო და გურია შეჭამა ფაროსანამ, მაგრამ ხელისუფლების მხრიდან არავითარი დახმარება მოსახლეობისთვის არ ყოფილა იმის მიუხედავად, რომ გაუნადგურდათ მოსავალი, ზამთრის სარჩო საერთოდ აღარ დარჩათ. კახეთში რომ წამოვა სეტყვა და ხელისუფლება ზარალის ანაზღაურებაზე იწყებს ფიქრსა და ლაპარაკს, სამეგრელო და გურია საქართველო არ არის? ასეთი ცალმხრივი მიდგომები არ არის გამართლებული.

რაც შეეხება სესხებს. ვისაც გაუნულდა, ჰგონიათ, რომ მათი საკრედიტო ისტორია სუფთა დაფასავით იქნება და არავითარი კვალი იმისა, რომ ეს ადამიანები იყვნენ ურჩი გადამხდელები, არსად არ გამოჩნდება, მაგრამ ეს ასე არ არის. როდესაც ისინი მიაკითხავენ ბანკებს სესხის ხელახლა ასაღებად, მაშინ მიხვდებიან, რომ ჯობდა, თვითონ გადაეხადათ ვალი, ვიდრე სახელმწიფოებრივი აქტით განულებულიყო მათი დავალიანება.
თვითონ მთავრობის არასწორი და გაუაზრებელი მოქმედება სწორედ იმაში მდგომარეობდა, რომ ნაწილ მოსახლეობას, ფაქტობრივად, ურჩ გადამხდელებს, შეღავათი გაეწია.

ამ ფინანსურ აქტს, ამ მოქმედებას, შეიძლება, არ მოჰყვეს ხმამაღალი და მკვეთრად გამოხატული პროტესტი მოსახლეობისგან, მაგრამ მათ გულში ეს უკმაყოფილება რჩება და ადრე თუ გვიან აუცილებლად იჩენს თავს ამა თუ იმ ფორმით.
გულნატკენი მოსახლეობა ძალიან რთული სამართავია.

იმის თქმა მინდა, რომ ამ საკითხისადმი სახელმწიფოებრივი მიდგომა არასწორი იყო. ერთადერთი, რითაც მდგომარეობის გამოსწორება შეიძლება, დამატებითი თანხების გამოყოფაა საჭირო და ვალებში ჩაფლული მოსახლეობისთვის სავალალო ტვირთის ოდნავ მაინც შემსუბუქება _ ვთქვათ, 20 000 ლარი ვალიდან 2 ან 3 000 რომ დაგიფარავენ, ამითაც მადლობელი იქნება ადამიანი.
შევთანხმდეთ იმაზე, რომ ე.წ. `შავი სიები~ არ უქმდება. წეღანაც გითხარით, ყველა ისტორია რჩება საკრედიტო ისტორიების ბიუროში და კონკრეტულ შემთხვევაში, როცა კომერციული ბანკი მიმართავს ბიუროს, მიაწვდიან ინფორმაციას, რომ მსესხებელი განულებულთა სიაშია. ბუნებრივია, ბანკი თავს შეიკავებს სესხის გაცემისგან.

ეს სიტუაცია რამდენიმე თვეში დადგება და ადამიანები, ახლა რომ კმაყოფილები არიან, ხვალ პროტესტს გამოხატავენ. ეს ჩვეულებრივი ამბავია _ ადამიანის ხასიათიდან გამომდინარე _ რაც უნდა კარგი გაუკეთო ადამიანს, შემოსადავებელი თუ მიეცი, უკან არ დაიხევს.

დაკრედიტების წესები, რომელიც შემოიღო ეროვნულმა ბანკმა, არის საკმაოდ მკაცრი და კომერციული ბანკები ვალდებულნი არიან, მსესხებლის ოჯახის თითოეული წევრის შემოსავალ-გასავალი შეისწავლონ და თუ აღმოჩნდა, რომ შემოსავლები არის ძალიან მცირე, სპეციალურ შკალაზე მოცემული ციფრების მიხედვით იძლევიან სესხებს. მაგალითად, თუ მსესხებლის შემოსავალი თვეში 1000 ლარია, მისი სასესხო მოთხოვნა არ უნდა აღემატებოდეს შემოსავლის 25%-ს, ანუ 250 ლარზე მეტის სესხის აღება არ შეუძლია. საკმაოდ მკაცრი პირობებია.

როგორც წესი, კანონს უკუქცევის ძალა არ აქვს და ის არ მოქმედებს ადრე არსებულ მდგომარეობაზე და თუ ვინმე ფიქრობს, რომ სესხი აუცილებლად უნდა აიღოს, დაელოდოს დროს, თორემ ახლა თუ აიღებს სესხს, მისი გადახდა ისეთივე მძიმე და რთული იქნება, როგორც ადრე იყო, რადგან კანონი არ არის მარეგულირებელი დოკუმენტი. ახალი ბრძანება უნდა გამოიცეს და შემდეგ შეიძლება საუბარი სესხების შესაძლო ლიბერალიზაციაზე. დრო დასჭირდება ამ პროცედურებს. ამ საკითხის განხორციელებას კომერციული ბანკებიც დააბკროლებენ, რადგან უმცირდებათ შემოსავალი. ეს არც მოსახლეობისთვის იქნება ხელსაყრელი, რადგან, ფაქტობრივად, დაბალშემოსავლიანი მოსახლეობისთვის საკრედიტო რესურსებისადმი წვდომა მნიშვნელოვნად იზღუდება.
ყველას გვახსოვს, მთავრობამ თავის დროზე სიღარიბესთან ბრძოლა გამოაცხადა. საინტერესოა, როგორ აპირებს ის ამის გაკეთებას? თუ იმით, რომ ღარიბს მოუსპოს მატერიალური მდგომარეობის გაუმჯობესების საშუალება, ეს არ არის სიღრიბესთან ბრძოლის არც სურვილი და არც მოქმედება. 

ეს არ ნიშნავს მხოლოდ იმას, რომ ღარიბი მოსახლეობა ვეღარ შეიძენს, ვთქვათ, ახალ მაცივარს, ახალ ტელევიზორს და ა. შ. ამას გაცილებით ღრმა ფესვები აქვს _ ასეთი ოჯახებიდან გამოსული ახალგაზრდები ოჯახებს ვერ შექმნიან, ბინას ვერ აიღებენ იპოთეკით, შეეშინდებათ ბავშვის გაჩენის და ა. შ.
მე სულ ვამბობ: ჩვენი ხელისუფლება, წინანდელი, იმის წინა, რატომღაც ისეთ გადაწყვეტილებებს იღებს, რომ არ აქვთ გათვლილი მოქმედებების რისკები, წინ არ იხედებიან. ამის მიზეზი, ჩემი აზრით, უცოდინარობა და არაპროფესიონალიზმია. არაერთხელ მითქვამს და კიდევ გავიმეორებ: ცოდნა, ცოდნა და კიდევ ერთხელ ცოდნა. პროფესიონალური განათლება აკლია ჩვენს ქვეყანას და სასტიკად აზარალებს მას. მაგრამ ყველაზე საწყენი და სავალალო ისაა, რომ სწორედ ეკონომიკურ გუნდში არის ასეთი პრობლემები. გაურკვეველი განათლების და გამოცდილების ადამიანები ინიშნებიან თანამდებობებზე ეკონომიკის კუთხით. როგორ შეიძლება რეფორმები ანდო ისეთ ადამიანებს, რომლებსაც წარმოდგენაც არ აქვთ ეკონომიკის ანბანზე?!

ისე არ გამიგოს ვინმემ, თითქოს საქართველოში არ იყოს განათლებული ადამიანები და კერძოდ, მცოდნე, პროფესიონალი ეკონომისტები. მე ვიცნობ ახალგაზრდებს, შესანიშნავ ეკონომისტებს, მცოდნეებს, მოაზროვნეებს, მაგრამ ისინი არ ჩანან და რატომღაც წამოტივტივებულნი არიან გაუგებარი ცოდნისა დ გამოცდილების ადამიანები. არ ვიცი, რა ნიშნით პოულობენ მათ. ბევრი კარგი ეკონომისტი გვყავს, რომლებიც კარგად გაართმევდნენ თავს პრობლემებს და ქვეყანა ეკონომიკურად უკეთეს მდგომარეობაშიც აღმოჩნდებოდა.

ირანდა კალანდაძე

მეტის ნახვა
26-12-2018, 11:00


(დასასრული. დასაწყისი იხ. "სგ" N42)

საქართველოს მთავრობამ, საქართველოს ეკონომიკის სამინისტრომ და ქალაქ თბილისის მერიამ ოფშორულ ზონაში რეგისტრირებულ შპს "მალთიფლექს ენერჯი ლიმიტედს" მიჰყიდა "თბილისის წყალი", "რუსთავწყალკანალი", "მცხეთაწყალკანალი", "საქწყალკანალი". ხელშეკრულების თანახმად, წილის ნასყიდობის საფასური იყო ჯამში 80 011 208 აშშ დოლარის ექვივალენტი ლარში. თანხის გადარიცხვა ორ ტრანშად განხირციელდა. კომპანიაში მალევე შეიცვალა მენეჯმენტი და გენერალურ დირექტორად რუსეთის მოქალაქე იური ლესი დაინიშნა. "ჯორჯიან უოთერ ენდ ფაუერის" სახელწოდებით კომპანია 2009 წლიდან ოპერირებს. კომპანიის მესაკუთრე "მალთიფლექს ენერჯი ლიმიტედსაც" სახელწოდება იმავე წელს შეეცვალა და "ჯორჯიან გლობალ უთილითის" გახდა.შპს "რუსთავწყალკანალი", შპს "მცხეთაწყალკანალი", შპს "საქწყალკანალი" და შპს "თბილისის წყლი" შპს "ჯორჯიან გლობალ იუთილითიზს" (ყოფილი შპს "მალტიპლექს ენერჯი ლიმითედს") საქართველოს მთავრობის 2008 წლის 14 მაისს გამოცემული № 325 განკარგულებით გადაეცა. არასამთავრობო ორგანიზაციამ "მწვანე ალტერნატივა" ამ კომპანიებთან მთავრობის მიერ გაფორმებული ხელშეკრულებები ვერ მოიპოვა ვერც სასამართლოს გზით. ხელშეკრულების სრული ტექსტი, ხელშეკრულების ერთ-ერთი მუხლითვე მიჩნეული იყო მყიდველის კომერციულ საიდუმლოდ. "ლუკოილ ჯორჯია" 100%-იანი წილის მფლობელია ნიდერლანდებში, "ლუკოილ ჯორჯიას" სამეთვალყურეო საბჭოს წევრები 2005 წლის 26 ოქტომბრის მდგომარეობით გახლდნენ, რუსეთის მოქალაქეები სერგეი ფედორცოვი და ვალერი გოლოვუშკინი, სამეთვალყურეო საბჭოს თავმჯდომარე კი ასევე რუსეთის მოქალაქე ფიკრეტ ალდაჯან ოგლია. 2005 წლის შემდეგ საჯარო რეესტრის ჩანაწერებში აღნიშნული მონაცემები არ შეცვლილა. "პეტროკას ენერჯი ლიმიტედი" საქართველოში ფლობს ფოთის ნავთობტერმინალებს, ბენზინგასამართი სადგურების ქსელს, თუმცა, აღნიშნული მფლობელობა საქართველოს საჯარო რეესტრში არ არის რეგისტრირებული. გარიგებები ოფშორულ ზონებში რეგისტრირებული კომპანიების საშუალებით ხორციელდებოდა. კომპანიის წარმომადგენლების საჯარო განცხადებების მიხედვით, "პეტროკას ენერჯი ლიმიტედის" ძირითადი მეწილე რუსეთში მოღვაწე ქართული წარმოშობის ბიზნესმენი დავით იაკობაშვილია, 2014 წლის 29 დეკემბერს რუსულმა კომპანია "როსნეფტმა" განაცხადა, რომ მან "პეტროკას ენერჯი ლიმიტედის" 49%-იანი წილი შეიძინა, თუმცა, აღნიშნული გარიგების შესახებ ინფორმაცია რეგისტრირებული არ არის საქართველოს საჯარო რეესტრში. სავარაუდოდ, აღნიშნული გარიგება ოფშორულ ზონაში რეგისტრირებულ კომპანიებს შორის გაფორმდა. "როსნეფტის" ინფორმაციით, გარიგების შედეგად კომპანიამ გაიმყარა ლიდერის პოზიციები კავკასიის რეგიონში არსებულ ნავთობბაზარზე. გარდა ამისა, "როსნეფტისვე" განცხადებით," პეტროკასთან" თანამშრომლობით მოხდება კავკასიისა და ცენტრალური აზიის მზარდი ბაზრების უკეთ ათვისება და ნავთობით მომარაგების დივერსიფიცირება. 

2003 წელს ხელისუფლების "ვარდების რევოლუციით" შეცვლიდან დაახლოებით სამ კვირაში, ბოლნისში ძვირფასი მადნის მომპოვებელ ყველა კომპანიაში, მათ შორის "კვარციტში", "მადნეულსა" და მათთან დაკავშირებულ სხვა კომპანიებში პროკურატურა შევიდა. 2003 წლის 15 დეკემბერს აღნიშნული კომპანიებიდან საფინანსო დოკუმენტაცია მოსამართლის ბრძანებით ამოიღეს, რადგან დაიწყო სისხლის სამართლის საქმის გამოძიება ყალბი ანგარიშფაქტურების დამზადების ფაქტზე. ამის შემდეგ მალევე, "კვარციტში" ავსტრალიური კომპანიის სრულუფლებიან წარმომადგენლად დაინიშნა იმდროინდელი მმართველი გუნდისა და პარლამენტის თავმჯდომარის მოადგილის, მიხეილ მაჭავარიანის ძმა ივანე მაჭავარიანი. 2004 წლის ნოემბერში "კვარციტისა" და "მადნეულის" გენერალურ დირექტორად, ასევე, ორივე კომპანიის სამეთვალყურეო საბჭოს თავმჯდომარედ დაინიშნა რუსეთში მოღვაწე ბიზნესმენი კობა ნაყოფია, რომელიც მოგვიანებით, 2008–2012 წლებში საქართველოს პარლამენტის წევრი გახდა, ის იყო მმართველი გუნდის, ფრაქცია "ერთიანი ნაციონალური მოძრაობის" წევრი. კობა ნაყოფია ჟურნალ "ლიბერალთან" საუბარში იხსენებს, რომ 2004 წელს ის რუსეთში, რუსი მილიარდერის, სერგეი გენერალოვის კომპანია "პრომიშლენიე ინვესტორში" მუშაობდა, როცა მას საქართველოს ეკონომიკის სამინისტროდან, იმდროინდელი მინიტრის, კახა ბენდუქიძის სახელით დაურეკეს და საქართველოში ჩამოსვლა შესთავაზეს. როგორც ნაყოფია იხსენებს, ბენდუქიძემ მას ასარჩევად "ჭიათურმანგანუმის", ან "მადნეულის" დირექტორობა შესთავაზა.

საქართველოს ხელისუფლებამ კობა ნაყოფიას ძვირფასი ლითონების მომპოვებელი სახელმწიფო საწარმოების პრივატიზებისთვის მომზადება დაავალა, 2005 წელს კი გასაყიდად გამოიტანა. კომპანიებისადმი დაინტერესება დიდი იყო, თუმცა, საბოლოოდ, "მადნეული" და "კვარციტი" კობა ნაყოფიას ყოფილი პარტნიორის, სერგეი გენერალოვის ჰოლდინგის, "პრომიშლენიე ინვესტორის" შვილობილმა კომპანიამ "გეოპრომაინინგმა" (Stanton Equites Corporation) შეიძინა დაახლოებით 33 მილიონ აშშ დოლარად. ოფიციალურად, "გეოპრომაინინგი" ვირჯინიის კუნძულებზეა რეგისტრირებული, თუმცა, "კვარციტისა" და "მადნეულის" რეალური მფლობელი რომ "პრომიშლენიე ინვესტორი" იყო, ამას კომპანიის ვებგვერდზე დღემდე განთავსებული ინფორმაციაც ადასტურებს. რაც შეეხება "პრომიშლენიე ინვესტორის" მფლობელს, რუს მილიარდერ სერგეი გენერალოვს ის რუსეთის პოლიტიკისა და ბიზნესის ერთ-ერთი გავლენიანი პერსონაა. (სააკაშვილის ბიძის თემურ ალასანიას მეგობარი) ბიზნესთან ერთად, გენერალოვს რუსულ პოლიტიკაში მოღვაწეობის გამოცდილებაც აქვს. "აიდიეს ბორჯომი საქართველოს" ოფიციალური მესაკუთრე არის ოფშორულ ზონაში რეგისტრირებული "აიდიეს ბორჯომი ბევერიჯიზ კომპანი". მისი დირექტორი კი რუსეთის მოქალაქე ვლადიმირ აშუროვია. აშუროვი ხელმძღვანელობს IDS  Borjomi International-საც. კავშირგაბმულობის კომპანია "მობიტელი" საქართველოში 2007 წელს "ბილაინის" ბრენდით შემოვიდა. კომპანია რუსული "ვიმპელკომის" ჯგუფის წევრია. ელმავალმშენებლის სადამფუძნებლო დოკუმენტაციაში რუსეთის მოქალაქეები 2005 წლიდან ჩნდებიან, როდესაც რუსულმა Dema Computers-მა აქციათა 51% შეიძინა. 36% ზურაბ ცინცაძეს, 12,76% კი საწარმოთა მართვის სააგენტოს დარჩა. სამეწარმეო რეესტრში დაცული დაკომუნეტებიდან არ ჩანს, რა თანხად იყიდა საკონტროლო პაკეტი Dema Computers-მა. "გაერთიანებული ქართული ბანკის" აქციები რუსულმა "ვითიბიმ" 2005 წელს შეიძინა. კომპანიის რებრენდინგი 2006 წლის დეკემბერში განხორციელდა, შეიცვალა სახელწოდება და "ვით იბი ბანკი" ეწოდა. "ვიმ ბილ დან საქართველო" რძის პროდუქტების მწარმოებელი რუსული სს "ვიმ-ბილ-დანის" მფლობელობაში მყოფი კომპანიაა. საქართველოში 2008 წელს დარეგისტრირდა. კომპანიის დამფუძნებელი რუსეთში მოღვაწე ქართული წარმოშობის ბიზნესმენი დავით იაკობაშვილია. ქართულ ბაზარზე მისი პროდუქცია ცნობილია სახელწოდებით "სოფლის ნობათი". 2011 წელს ვიმ ბილ დანის აქციათა 66% პეპსიკომ 3.8 მილიარდ დოლარად იყიდა 56. მანამდე ის 11%-ს ფლობდა. ამ გარიგებთ "პეპსიკო" ჯამში კომპანიის აქციების 77%-ს მფლობელი გახდა.
 
დოკუმენტებით ირკვევა, რომ "ტიფლისკი ვინნი პოგრების" 100 პროცენტიანი წილი "დიონისემ" "დკ სერვისს" 2014წლის ოქტომბერში 2 ათას ლარად მიჰყიდა. "დკ-სერვისის" მფლობელი რუსეთის მოქალაქე ელენა შჩელკანოვაა, გენერალური დირექტორი კი – იმავე ქვეყნის მოქალაქე ნაძეჟდა სტროკატოვა. ვიდრე "დიონისე" "დკ სერვისს" მიყიდიდა, "ტიფლისკი ვინი პოგრების" დირექტორი რუსეთის მოქალაქე გერმან ლისოვი იყო.

ეს მხოლოდ მცირე ჩამონათვალია იმ ბიზნესებისა, რომლებიც "ნაცმოძრაობამ" მისთვის საძულველ რუსეთს გადასცა ხელისუფლებაში ყოფნის 9 წლის განმავლობაში.

ქეთევან ზარნაძე

მეტის ნახვა
29-11-2018, 11:30


"დღეს, განსხვავებით სამი თვის წინანდელიდან, რუსეთის საზოგადოებრივი აზრი მკვეთრად პოზიტიურად განეწყო საქართველოს მიმართ. მე ეს ვერ წარმომედგინა რომ შეიძლება ასე სწრაფად მომხდარიყო. დღეს საქართველოს ხსენებაზე, რუსეთში უკვე აღარ არის ის უარყოფითი, რომელიც იყო და რომელმაც ძალიან დაგვაზარალა თავის დროზე. დღეს აღარ არის მოდაში, თუნდაც ყველაზე ნაციონალისტი პოლიტიკოსების მხრიდან, საქართველოს ლანძღვა და ამით პოლიტიკური ქულების დაწერა, იმიტომ, რომ ამას აზრი არა აქვს. და თავის დროზე ასეთმა რიტორიკამ საქართველოში, ათჯერ და ასჯერ დაგვაზარალა და სერიოზულად მოგვითხარა ძირი აფხაზეთშიც და საქართველოს სხვა რეგიონებში.
ამიტომ სერიოზული, პარტნიორული ურთიერთობის წარმოება რუსეთთან, მე მიმაჩნია ჩემს ერთ-ერთ მთავარ ამოცანად და ამ მხრივ ჩვენ, უახლოეს პერიოდში, იმედია, მივიღებთ სავიზო რეჟიმის გამარტივების გადაწყვეტილებას, რაც მნიშვნელოვანია. შეიძლება მთლიანად შეცვლა, მთლიანად გაუქმება, სწორი არც იყოს, მაგრამ გამარტივება სრულიად აუცილებელია. ჩვენ მივიღებთ ახალი ეკონომიკური პრეფერენციების მიღების გარანტიებს რუსეთიდან, ყოველშემთხვევაში, ამაზე ვლაპარაკობთ. მნიშვნელოვანია, რომ სხვა ნაბიჯები გადმოდგა რუსეთმა ჩვენთან შესახვედრად და ჩვენც უნდა გვესმოდეს, რომ ეს არის მხოლოდ ჩვენთვის სასარგებლო, ჩვენს წინაშე მდგომი, ასევე შიდა ამოცანების აუხლოეს მომავალში გადასაწყვეტად, ეს არის ერთ-ერთი ყველაზე სერიოზული ფაქტორი", – ამ სიტყვების ავტორი არის მიხეილ სააკაშვილი და ეს მან პარლამენტში განაცხადა, ეგრედ წოდებული ვარდების რევოლუციიდან რამდენიმე თვეში. ამის შემდეგ იყო – პუტინს პატიოსანი კაცის თვალები აქვს. 

იმ დროინდელი ხელისუფლება ხაზგასმით აღნიშნავდა, რომ ბევრს მუშაობდა, რათა ქვეყანაში გაზრდილიყო უცხოური ინვესტიციების შემოსვლა. თუმცა, აღსანიშნავია, რომ ისეთ მნიშვნელოვან სფეროებში, როგორიც არის ელექტროენერგია, წყალმომარაგება, მადნეული, მინერალური წყლები, განხორციელებული ინვესტიციების დიდი წილი რუსულ კომპანიებზე მოდის. 2015 წლის მდგომარეობით, კომპანია "ინტერ რაო", რომლის აქციონერები რუსული სახელმწიფო კომპანიები არიან, ფლობენ საქართველოს ენერგოსადისტრობუციო კომპანია "თელასს", თბოსადგურ "მტკვარი ენერგეტიკას", ჰესებს "ხრამჰესი 1", "ხრამჰესი 2". "ინტერ რაოს" მართვაში აქვს გადაცემული ყველაზე მძლავრი ჰიდროელექტროსადგური "ენგურჰესი". რუსეთის მოქალაქე ფლობს შპს "ენერგიასაც", რომელსაც ეკუთვნის დარიალი ჰესი, ლარსი ჰესი, შილდა ჰესი. რუსეთის მოქალაქეების საკუთრებაშია ავანიჰესი, ალგეთი ჰესი, სკურდიდი ჰესი. ქართული და რუსული მხარე ერთობლივად ფლობენ "საქრუსენერგოსაც", რომელიც ქვეყანაში ელექტროენერგიის გადამცემ სისტემას განკარგავს. რუსეთის მოქალაქეების საკუთრებაშია ჟინვალჰესი, რუსეთის მოქალაქეების საკუთრებაშია ნავთობ კომპანიები "ლუკოილი", "გალფი", "ფოთის ნავთობტერმინალი", ძვირფასი ლითონების მომპოვებელი კომპანიები RMG Gold და RMG Copper, აგრეთვე მინერალური წყლების მწარმოებელი "ბორჯომი", მუდმივი დენის მაგისტრალური ელმავლების მწარმოებელი სს “ელმავალმშენებელი”, "ვითიბი ბანკი ჯორჯია", ფიჭური კავშირგაბმულობის კომპანია "ბილაინი" და ბევრი სხვა კომპანიები. აღსანიშნავია რომ, იმ ფონზე, როდესაც საქართველოში პრობლემები ექმნებათ ირანისა და ინდოეთის მოქალაქეობის მქონე ბიზნესმენებს, შეუფერხებლად საქმიანობენ ის რუსული კომპანიები, რომლებსაც ამერიკის შეერთებულმა შტატებმა და ევროკავშირმა სანქციები დაუწესა – მათ შორისაა "ლუკოილი", "ვითიბი ბანკი" და "როსნეფტი", რომელიც ოფშორული კომპანიების საშუალებით ფლობს ფოთის ნავთობტერმინალებს და ბენზინგასამართი სადგურების ქსელს. სანქციები რუსეთის წინააღმდეგ ბოლო ათწლეულში რამდენიმეჯერ გააფართოვეს ევროკავშირმა და აშშ-მ, მიზეზი კი უკრაინის აღმოსავლეთში რუსეთის მიერ უკრაინელი ამბოხებულების მხარდაჭერა და კონფლიქტის ესკალაცია გახდა. ყველაზე ფართომასშტაბიანი სანქციების შესახებ აშშ-მ და ევროკავშირმა 2014 წლის სექტემბერში გამოაცხადეს. სანქციების მიხედვით, ამერიკულ და ევროპულ კომპანიებს აეკრძალათ სანქცირებულ რუსულ კომპანიებთან თანამშრომლობა, მათთვის ნავთობის მომპოვებელი და ნავთობსაბადოების საკვლევი ტექნოლოგიების მიწოდება, ასევე, გრძელვადიანი სესხების მიცემა და ა.შ. სანქციები, ძირითადად, შეეხო ენერგეტიკის, ნავთობისა და საბანკო სექტორებს. სანქცირებულთა შორის აღმოჩნდნენ რუსეთის უმსხვილესი ბანკები, მათ შორის VTB ბანკი, აგრეთვე, უმსხვილესი ნავთობკომპანია "როსნეფტი" და "ლუკოილი". მიუხედავად იმისა, რომ საქართველოს ჰქონდა საერთაშორისო სანქციებისთვის მიერთების პრაქტიკა, რუსეთის შემთხვევაში აღნიშნული გადაწყვეტილება ხელისუფლებამ ვერ მიიღო. 

საქართველოში დაფუძნებული კომპანიების, ნუსხა რომლებსაც რუსეთის მოქალაქეები ფლობენ საკმაოდ ვრცელია, აღსანიშნავია ის ფაქტიც, რომ "ნაცხელისუფლება" თან რუსეთს ლანძღავდა და არასასურველ ხალხს რუსეთის აგენტს უწოდებდა, თან სარფიანად ყიდდა სტატეგიულ ობიექტებს "მოსისხლე მტერ სახელმწიფოს~ მოქალაქეებს. 2015 წლის მონაცემებით, "ინტერ რაო" -ს საკუთრებაშია "თელასის" აქციათა 75%, დაახლოებით 25%-ს კი ქართული სახელმწიფო ფლობს. 2011 წელს გაფორმებული ახალი მემორანდუმით, “ინტერ რაო” ხრამზე სამი ახალი ჰიდროელექტროსადგურის მშენებლობის ვალდებულებას იღებდა, რისთვისაც 193 მილიონი დოლარის ინვესტირება უნდა განეხორციელებინა. ამ პროექტით ახალი ჰესებით 85100 მეგავატი ენერგიის გამომუშავება იყო დაგეგმილი. IDFI-მ გამოიკვლია, რომ "ხრამჰესის" გაყიდვიდან მიღებული თანხა (99 774 000 ლარი) ქუთაისში პარლამენტის ახალი შენობის აშენებას მოხმარდა. 2008 წლის დეკემბერში, რუსეთ – საქართველოს ომის დასრულებიდან რამდენიმე თვის შემდეგ, საქართველოს ენერგეტიკის სამინისტრომ "ინტერ რაოსთან" კიდევ ერთი მემორანდუმი გააფორმა, რაც "ენგურჰესის" ერთობლივ მართვას გულისხმობდა. "ენგურჰესი" უდიდესი ჰიდროელექტროსადგურია კავკასიაში, რომელიც მდინარე ენგურთან მდებარეობს. მასში შედის ვარდნილჰესების კასკადიც. მისი ჯამური სიმძლავრე 1300 მგვტ-ია. ენგურჰესის კაშხალი საქართველოს კონტროლირებად ტერიტორიაზეა, ხოლო ელექტროსადგური ადმინისტრაციული საზღვრის აფხაზურ მხარეს მდებარეობს. "ინტერ რაოსა" და საქართველოს შორის დადებული მემორანდუმის შესახებ ქართულმა მხარემ პირველი კომენტარი ხელმოწერიდან ორი კვირის შემდეგ გააკეთა. 2009 წლის 12 იანვარს ენერგეტიკის მინისტრმა ალექსანდრე ხეთაგურმა მედიას განუცხადა, რომ ენგურჰესის მართვა რუსული და ქართული მხარეების მიერ ერთობლივად განხორციელდება. "ინტერ რაოს" მიერ გავრცელებული ინფორმაციით, ხელმოწერილი მემორანდუმის მიხედვით, მხარეები შეთანხმდნენ ენგურჰესის "ეფექტიანად ექსპლუატაციის" მიზნით შეიმუშავონ ათ წელზე არანაკლები ხანგრძლივობის პროგრამა. მაღალი საზოგადოებრივი ინტერესის მიუხედავად, რუსულ კომპანიასთან დადებული მემორანდუმი არ გასაჯაროებულა. უცნობი დარჩა რეალურად რას ითვალისწინებდა მხარეებს შორის შეთანხმება. რამდენიმე ჰიდროელექტროსადგური ეკუთვნის შპს "ენერგიას", რომელიც 2010 წელს საქართველოში დაფუძნდა. მისი 70 პროცენტი რუსეთის მოქალაქე მევლუდ ბლიაძეს ეკუთვნის, 30 პროცენტი კი შპს "ფერის" მფლობელობაშია. შპს "ენერგია" სს "დარიალი ენერჯის" აქციონერია. სტატისტიკის ეროვნული სამსახურის მიერ მოწოდებული ინფორმაციით, მევლუდ ბლიაძის ინვესტიცია 2011 წელს რუსეთიდან განხორციელებულ ყველაზე მსხვილ ინვესტიციებს შორის მოხვდა. მევლუდ ბლიაძე საქართველოში დაიბადა. მოგვიანებით რუსეთში გადავიდა საცხოვრებლად. 1992 წელს კი რუსული სააქციო საზოგადოება "პილონის" ხელმძღვანელობა დაიწყო. დღეს ის კომპანიის დირექტორთა საბჭოს თავმჯდომარეა. "პილონი" სანკტ პეტერბურგში ხიდების, გზების რეკონსტრუქციასა და შეკეთებას უზრუნველყოფს და ერთ-ერთი ლიდერი კომპანიაა ამ მიმართულებით. 2012 წელს ამ კომპანიის მიერ განხორციელებული მორიგი პროექტის გახსნას თავად პრემიერ მინისტრი დიმიტრი მედვედევი ესწრებოდა. მევლუდ ბლიაძეს მინიჭებული აქვს "რუსეთის დამსახურებული მშენებლის" წოდება. წყალმომარაგების სექტორში რუსეთის მოქალაქეების მიერ დაფუძნებული კომპანიის გამოჩენა საქართველოში 2008 წლის მაისიდან იწყება. 

(გაგრძელება იქნება)

ქეთევან ზარნაძე

მეტის ნახვა
26-11-2018, 19:15


საქართველოს პრემიერ-მინისტრის მამუკა ბახტაძის განცხადება

"დღეს მინდა გაგაცნოთ უმნიშვნელოვანესი გადაწყვეტილება, რომელიც მძიმე ტვირთს მოუხსნის ასობით ათას ოჯახს.
ყველანი ვთანხმდებით, რომ ჭარბვალიანობის დაძლევის გარეშე სიღარიბის დამარცხება წარმოუდგენელია. ამისი ნათელი დასტურია იუნისეფის ბოლო კვლევაც, რომელმაც პირდაპირ მიუთითა ჭარბვალიანობასა და სიღარიბეს შორის მიზეზ-შედეგობრივ კავშირზე და ცხადჰყო, რომ ჭარბვალიანობის ტვირთი იმდენად მძიმეა ბევრი ქართული ოჯახისთვის, რომ უარყოფით ასახვას ჰპოვებს ბავშვების და მოზარდების განვითარებაზე.

ეს პრობლემა წლების მანძილზე ბორკილებად ედო ჩვენს საზოგადოებას და დღეს თითქმის 700 000-ზე მეტი მოქალაქე იმყოფება ე.წ. შავ სიაში, რის გამოც, პრაქტიკულად, მოკლებულია სრულფასოვანი ეკონომიკური საქმიანობის შესაძლებლობას.

ამ გამოწვევაზე პოლიტიკაში მობრუნებისთანავე გაამახვილა ყურადღება ჩვენი პარტიის თავმჯდომარემ, ბატონმა ბიძინა ივანიშვილმა.
ამაზე ვსაუბრობდი მეც, ჯერ კიდევ ფინანსთა მინისტრად მუშაობის პერიოდში და ახალი მთავრობის დამტკიცების დროსაც საქართველოს პარლამენტში და შემდეგ უკვე მთავრობის სხდომაზე დავდეთ პირობა, რომ წლის ბოლომდე გადავდგამდით პრინციპულ ნაბიჯებს ე.წ. შავი სიის პრობლემის მოსაგვარებლად.
მინდა გითხრათ, რომ მიმდინარეობდა ხანგრძლივი და რთული მოლაპარაკებები და მოხარული ვარ, რომ როგორც საბანკო, ასევე არასაბანკო სექტორის უდიდესმა ნაწილმა და მათ შორის ეგრეთ წოდებულმა სესხების ამომღებმა ბიუროებმა გაიზიარა ჩვენი პრინციპული პოზიცია, გამოიჩინა მაღალი სოციალური პასუხისმგებლობა და მივედით გადაწყვეტილებამდე, რომელიც შვებას მისცემს ასობით ათას ოჯახს.

განსაკუთრებული მადლობა მინდა გადავუხადო საქველმოქმედო ფონდ "ქართუს". რომ არა ფონდის მხარდაჭერა, ამ ძალიან მნიშვნელოვანი ინიციატივის რეალიზაცია ვერ მოხდებოდა.

მინდა განვუმარტო საზოგადოებას, რომ შავ სიაში დაფიქსირებული ვალების თითქმის 95% შედგება სესხებისგან, რომელთა ძირი თანხაც ორი ათას ლარს არ აღემატება. საუბარია 600 ათასზე მეტი მოქალაქის ფინანსურ ვალდებულებებზე, ბანკების, ონლაინ ორგანიზაციების თუ სხვადასხვა საფინანსო ინსტიტუტების მიმართ, რომელიც ჯამში შეადგენს დაახლოებით მილიარდნახევარ ლარს.

დღევანდელი გადაწყვეტილებით ეს მილიარდნახევრიანი დავალიანება უნულდებათ ჩვენს მოქალაქეებს.
ხაზგასმით აღსანიშნავია, რომ ამ კატეგორიაში შედის თითქმის 150 ათასი სოციალურად დაუცველი და ათეულობით ათასი შეზღუდული შესაძლებლობის მქონე ჩვენი მოქალაქე.

მიმდინარეობს მუშაობა მოვალეთა რეესტრის ბაზებზე, ვალების განულების პროცესი დაიწყება 15 დეკემბერს და 31 დეკემბერს დასრულდება. 600 ათასი მოქალაქე და მათი ოჯახები 31 დეკემბრამდე გარანტირებულად ამოვა მოვალეთა რეესტრიდან და ვალების გარეშე შეხვდება ახალ წელს.
ამ 600 ათასი მოქალაქის ვალდებულების განულების შესახებ შეთანხმება უკვე მიღწეულია, თუმცა მუშაობა გრძელდება და სხვა ფინანსური ორგანიზაციების მიერ ჩვენს ინიციატივასთან შემოერთების პარალელურად ვალებისგან გათავისუფლებულ მოქალაქეთა რაოდენობა კიდევ უფრო გაიზრდება.
სამწუხაროდ, ჯერ კიდევ მწვავე გამოწვევად რჩება ე.წ. მევახშეობით უსამართლოდ დაზარალებული მოქალაქეების პრობლემა. მინდა გითხრათ, რომ ამ მიმართულებით აქტიურად ვმუშაობთ და ვიმედოვნებ, რომ დადებით შედეგს ამ ნაწილშიც მივაღწევთ.

ჩვენი მიდგომაა, ჭარბვალიანობა, როგორც რისკი და მძიმე ტვირთი ზოგადად იქნას დაძლეული. შესაბამისად გავაგრძელებთ მუშაობას, რომ მოქალაქეებს თავისი შემოსავლის უდიდესი ნაწილი არ მისდიოდეთ ვალების მომსახურებაში და ზოგადად, ვალების მომსახურების კოეფიციენტი გავუტოლოთ ჯანსაღ საერთაშორისო პრაქტიკას.

ჭარბვალიანობის აღმოფხვრა არის სიღარიბის დამარცხების წინაპირობა. დღეს გაცხადებული გადაწყვეტილება საშუალებას მისცემს ასეულობით ათას ჩვენს თანამოქალაქეს სრულფასოვნად ჩაერთონ ქვეყნის ეკონომიკურ და სოციალურ ცხოვრებაში, რაც უფრო მდგრადს გახდის ჩვენს ეკონომიკას, ხოლო საბანკო-საფინანსო სექტორს უფრო ჯანსაღს.

ჩვენი პოლიტიკური გუნდისთვის ადამიანი იყო, არის და იქნება მთავარი ფასეულობა."

"საერთო გაზეთის" კომენტარი:

ბიძინა ივანიშვილმა კიდევ ერთხელ გაგვაოცა თავისი უპრეცედენტო მასშტაბის ქველმოქმდებით და 600 000 ადამიანის საბანკო დავალიანების დაფარვა თავის თავზე აიღო.

ბანკების მიერ წლების განმავლობაში შავ სიაში ჩაკეტილი და მძევლებად აყვანილი ყველა მიმართულებით გზამოჭრილი 600 000 ადამიანი, ამიერიდან, თავისუფალია და ახალ წელს ვალების გარეშე შეხვდება.

რა უნდა იყოს ამაზე უფრო სასიხარულო ამბავი ქვეყნის ცხოვრებაში _ საქმე ხომ ჩვენს გაჭირვებულ თანამემამულეებს, ჩვენს სისხლსა და ხორცს ეხება და თუ მთლად წყალწაღებული ნაძირალა არ ხარ, ეს ამბავი, ცხადია, უნდა გიხაროდეს, მაგრამ ის, რაც მთელი ერისთვის მართლაც საზეიმო მოვლენაა, "ნაცმოძრაობისთვის" გლოვისა და მწუხარების საგნად იქცა.

"ნაცმოძრაობა" შოკშია და დამბლადაცემულივით ლუღლუღებს: არ დაიჯეროთ, ივანიშვილი გატყუებთო.

"ნაცმოძრაობას" მისი სატელიტი რამდენიმე არასამათავრობო ორგანიზაცია აჰყვა და განგაში ატეხა: ყველაფერი ეს ამომრჩეველთა მოსყიდვას ჰგავსო.
არა, ძვირფასო ასო-ებო, ეს არ არის მოსყიდვა _ მოსყიდვის კლასიკური მაგალითი ის იყო აგერ, სულ ახლახან, "ნაცმოძრაობა" ხელშეკრულებებს რომ აფორმებდა მოსახლეობასთან და ხელისუფლებაში მოსვლის შემთხვევაში ვალების დაფარვას, სახლების გამოსყიდვას და სახლების აშენებას რომ ჰპირდებოდა.
ასო-ებს მაშინ ხმა არ ამოუღიათ, რაც კიდევ ერთი დასტურია იმისა, სინამდვილეში ვისი ასო-ები არიან ეს სინდისგარეცხილები.

_ "ქართულმა ოცნებამ" ჩვენ მოგვპარა ეს იდეა. გუშინ თუ გუშინწინ რომ დავაანონსეთ, ის იდეა მოგვპარაო, _ წიკვინებენ ნაციონალები.
გუშინ და გუშინწინ კი არა ნახევარი წლის წინათ დაიწყო ამ თემაზე საუბარი "ქართული ოცნების" ხელისუფლებამ და რამდენიმე ძალიან მნიშვნელოვანი გადაწყვეტილება მიიღო საბანკო სექტორში შექმნილი მდგომარეობის გამოსასწორებლად.

ნახევარი წლის წინათ პოლიტიკაში დაბრუნებისთანავე ისაუბრა ამ საკითხებთან დაკავშირებით ბიძინა ივანიშვილმაც, რომელმაც პირდაპირ განაცხადა: არ შეიძლება ამის მოთმენა, ორმა ბანკმა გადაჭამა მთელი ქვეყანაო.

თუმცა არის ერთი გარემოება, რაზეც ამომრჩეველი განსაკუთრებით ვაშაძის, ანუ "ნაცმოძრაობის" ამომრჩეველი აუცილებლად უნდა დაფიქრდეს.
გამორიცხულია ეს ამბავი, მაგრამ, ვთქვათ და, რომ გაპრეზიდენტდეს ვაშაძე, ის ამ მილიარდნახევრის გადამხდელი რომ არ არის, ხომ ფაქტია, მისი შეფიც, სააკაშვილიც, როგორც თვითონ ამბობს, ჯიბექესატადაა, თუმცა, არაუშავსო, ირწმუნება მიშა _ თქვენ გრიშა აირჩიეთ პრეზიდენტად, მერე მე ჩამოვალ და იმ მილიარდნახევარს სასწრაფოდ მოვატანინებ ივანიშვილს და ვალებსაც გაგინულებთო.

არ გეგონოთ, ვხუმრობდეთ, სიტყვასიტყვით ასე თქვა სააკაშვილმა ამ ორიოდე დღის წინათ.
არა, არ იქნება ამ კაცის გამოსწორება _ ხომ ხედავთ, ისევ წართმევაზე, დაყაჩაღებაზე, წაგლეჯაზე უჭირავს თვალი.

კი, მაგრამ, ყაჩაღი და ბანდიტი რაში გვჭირდება ივანიშვილთან `შუამავლად~, როცა ეს ადამიანი თავისი ნება-სურვილით და თავისი ინიციატივით აპირებს თანამემამულეებისთვის ხელის გამართვას, როგორც ეს ათასჯერ გაუკეთებიათ მანამდეც.

რაც შეეხება ბანკებს, რაკი ყინული დაიძრა და საბანკო სექტორში რეფორმები დაიწყო, ეს პროცესი მხოლოდ შავი სიების გაუქმებით და მოქალაქეთა ნაწილისთვის ვალების ჩამოწერით არ დამთავრდება.

"საერთო გაზეთი"

მეტის ნახვა
22-11-2018, 10:30


ქვევრის ღვინის მწარმოებელმა ქართულმა კომპანიებმა აშშ-ში, ნიუ-იორკში გამართულ ბუნებრივი ღვინოების საერთაშორისო გამოფენაში – RAW Wine მიიღეს მონაწილეობა.

გამოფენის სტუმრებს საშუალება ჰქონდათ, დაეგემოვნებინათ ქართული ქვევრის ღვინო, გაცნობოდნენ მისი დამზადების უძველეს ტრადიციებს, ქვეყნის კულტურასა და ისტორიას. ღვინის ეროვნული სააგენტოს მხარდაჭერით, გამოფენაში ექვსი ქართული კომპანია მონაწილეობდა, რომლებიც თავიანთ პროდუქციას 11-12 ნოემბერს ლოს-ანჯელესში დაგეგმილ ამავე ფორმატის გამოფენაზე – RAW Wine LA წარადგენენ.

როგორც ღვინის ეროვნულ სააგენტოში აცხადებენ, მსგავსი სახის ღონისძიებებზე ქართული ღვინის წარდგენით იზრდება ქვევრის ღვინის ცნობადობა, რაც იძლევა პოტენციური იმპორტიორების მოძიებისა და ექსპორტის ზრდის შესაძლებლობას. ამასთან, მიმდინარე წლის 10 თვის მონაცემებით, საქართველოდან აშშ-ში ექსპორტირებულია 400 ათასამდე ბოთლი (0,75 ლ) ღვინო, რაც ერთი პროცენტით აღემატება გასული წლის ანალოგიურ მაჩვენებელს.

გამოფენას RAW WINE სხვადასხვა ქვეყნიდან ასზე მეტი ღვინის მწარმოებელი და რამდენიმე ათასი სტუმარი დაესწრო. აღნიშნული გამოფენა ერთ-ერთ საუკეთესოდ მიიჩნევა, სადაც მაღალი ხარისხის ბუნებრივი და ბიოდინამიური ღვინოების მწარმოებლები იკრიბებიან.
1tv.ge

მეტის ნახვა
6-11-2018, 11:30


ზაზა ოქუაშვილი - ოსტაპ ბენდერის  ზეაღმატებული "მემკვიდრე"?!
(გაგრძელება, დასაწყისი იხ. "სგ" N37)

მოდი და გაიგე, როდის ცრუობს და როდის ღაღადებს სიმართლეს ზაზა ოქუაშვილი, თუ "ქართული ოცნება" ასე ატერორებდა, 2016 წელს რატომღა უხდიდა მადლობას ხელისუფლებას? მადლობას კი იხდიდა, მაგრამ გულს თურმე სხვა ზრახვები უღრღნიდა "პატივცემულ" ზაზას, როგორც ირკვევა, მადლიერების გამოხატვამდე გაცილებით ადრე დაუწყია ინტრიგების ხლართვა. საქმეში ჩახედული ადამიანების ცნობით, ის ჯერ თავის ძველ ნაცნობს, იმჟამად სპორტის მინისტრ ლევან ყიფიანს დაუკავშირდა, თავის რომელიღაც კომპანიაში დაპატიჟა, დროებით სარგელობაში "ბმვ"-ს მარკის ავტომანქანაც გადასცა ნდობის გასაღრმავებლად. ყიფიანი უმუშევარი რომ დარჩა, ოქუაშვილმა თავისთან "დაასაქმა", თუმცა 2-3 წელი ხელფასს არ უხდიდა. "ქართული ოცნების" სხვა წევრებზეც რომ ჰქონოდა "კომპრომატები", ოქუაშვილს მაშინდელი ფინანსთა მინისტრის ნოდარ ხადურის მეუღლეც დაუპატიჟებია ერთ-ერთ პრეზენტაციაზე, რაც ვიდეოზე გადააღებინა, ანუ "მტკიცებულება" შექმნა. ნოდარ ხადურს ავტომანქანების გამოძალვასთან კავშირში რომ "ამხელდა" და ვინიცობაა ეს უკანასკნელი იუარებდა, ზაზა-ბატონი ამ "კომპრომატს" გამოუქვეყნებდა, მაშინ შენს ცოლს ჩემს კომპანიაში რა უნდოდაო. ოქუაშვილს სხვების მიმართაც გამოუჩენია "გულუხვობა", ავტომანქანებით დაუსაჩუქრებია დიდი ბრიტანეთის ელჩი, ტურიზმის დეპარტამენტი, ერთ-ერთი აჭარელი კოლეგა-დეპუტატი, დაუზუსტებელი ინფორმაციით, მინისტრთა კაბინეტის წევრებსაც სთხოვდა, სხვადასხვა ღირებულების ავტომობილები საჩუქრად წაიყვანეთო. "ავი ენები" იმასაც ამბობენ ზაზა ოქუაშვილმა `ფილიპ მორისი~ და "საქართველოს ბანკი" მილიონობით თანხაში "გადააგდო", "ომეგას" ამერიკული კომპანიის 120-მილიონიანი დავალიანება ჰქონდა, ამიტომ "ფილიპ მორისი" მათთან ხელშეკრულებას წყვეტდა, ოქუაშვილმაც შემდეგი გეგმა მოიფიქრა, თუ ამერიკელები "ომეგასთან" აღარ ითანამშრომლებდნენ, 120 მილიონი დოლარის სანაცვლოდ, მხოლოდ "ომეგას" კუთვნილი შენობა-ნაგებობები შერჩებოდათ ხელში. ოქუაშვილმა მთელი თავისი ქონება "საქართველოს ბანკში" ჩადო 30 მილიონ დოლარად, მიღებული თანხა ოფშორულ კომპანიაში (პანამა) გადარიცხა, ანუ ფული გადამალა. ბანკის ხელმძღვანელობამ რომ გაიგო "ფილიპ მორისი" "ომეგასთან" თანამშრომლობას წყვეტდა, მიხვდნენ 30 მილიონ დოლარში მხოლოდ ვაშლიჯვრის მიწის ნაკვეთი და შენობა-ნაგებობები რჩებოდათ, ანუ გაცილებით ნაკლებად ღირებული ქონება. ბანკის წარმომადგენლები მაშინვე დაუკავშირდნენ ოქუაშვილს, ამან სესხის აღება არ უარყო, მაგრამ ფულს ვეღარ დავაბრუნებ და სესხის გადახდა არ შემიძლიაო. "საქართველოს ბანკმა" სასამართლოს მიმართა და მხოლოდ ოთხწლიანი დავის შემდეგ მოახერხა პროცესის მოგება. 

"ფილიპ მორისი~ და "საქართველოს ბანკი" რას მიქვია, როცა ზაზა ოქუაშვილს საკუთარი მამა ჰყოლია ორგზის "გადაგდებული" და სასამართლო დავებიც ჰქონია ამ საქმეებზე. ბოლო ხანს, ინტერნეტტელევიზიით გავრცელდა სიუჟეტი ზაზა ოქუაშვილის "საქმენი საგმირონის" შესახებ. 2003 წელს, ზაზა-ბატონს სამი სასამართლო დავა ჰქონდა, ორ მათგანში მამამისი, აწ გარდაცვლილი რობერტ ოქუაშვილი უჩიოდა, მესამეში თავისი მცირეწლოვანი შვილის დედა, რომელიც რამდენიმე წლიანი თანაცხოვრების დროს შეძენილი ბავშვის შვილად აღიარებას ითხოვდა ზაზა ოქუაშვილისგანო. რობერტ ოქუაშვილის მტკიცებით, ზაზამ მინდობილობაზე მამის ხელმოწერა გააყალბა და ამ ყალბი მინდობილობის გამოყენებით, მას მალულად გაუყიდა სარაჯიშვილის ქუჩაზე მდებარე კომერციული ფართი (მიწის ნაკვეთი და მასზე არსებული შენობა-ნაგებობა), სადაც ახლა "ომეგას" სტამბაა განთავსებული. რაც შეეხება მეორე სარჩელს, რობერტ ოქუაშვილის განცხადებით, ჩუბინაშვილის ქუჩაზე მდებარე მისი კუთვნილი ფართი (1020,66 კვ.მ), ტელეკომპანია "იბერიის" ტერიტორია, იჯარით ჰქონდა შვილისთვის გადაცემული, მაგრამ ხუთი წლის განმავლობაში მისგან ერთი თეთრი არ მიუღია. ზაზა ოქუაშვილმა გავლენიანი მფარველების წყალობით, სამივე დავა მოიგო, მარტოხელა დედაზე ისიც უთქვამს, ეგ ჩემი კი არა, მამაჩემის საყვარელი იყოო, რაც მისმა დაცვის წევრებმა დაუდასტურეს, მიუხედავად იმისა, რომ ამ ქალბატონის სარჩელი უამრავი მოწმის ჩვენებით იყო გამაგრებული, სასამართლომ მხოლოდ ზაზას "ტელახრანიტელების" ვერსია მიიჩნია სარწმუნოდო. "ომეგაში" უმუშავია ოქუაშვილის დედასაც, მაგრამ მამაზე გამწყრალ ზაზა-ბატონს თანამშრომლების თანდასწრებით, ხელისკვრით გაუგდია დედამისი სამსახურიდან. როცა ამ ინფორმაციებთან დაკავშირებით, ჟურნალისტმა კითხვა დაუსვა ზაზა ოქუაშვილის თანამეცხედრეს, ქალბატონმა პარლამენტარმა მოკლე პასუხით გამოისტუმრა, ჩემი მამათილი რვა წლის გარდაცვლილია, მოდით, ცოცხლებზე ვილაპარაკოთო. ვერაფერს იტყვით, "რკინისებური" არგუმენტია. ძალზე საინტერესოა 51-მილიონიანი საბიუჯეტო დავალიანების ამბავი, რომელმაც კოლექტიური ნაცები უნისონში ააჟრიამულა "ყარიბ" პრეზიდენტყოფილთან. კომპეტენტური წყაროების ცნობით, როდესაც ზაზა ოქუაშვილი მთავრობის გარკვეულ წევრებთან "სიამტკბილობაში" გახლდათ, სამი თვით ადრე გაარკვია, რომ აქციზის გადასახადი თამბაქოს ნაწარმზე 1 სექტემბრიდან 50 თეთრით ძვირდებოდა. მან მაშინვე ე.ი. წინასწარ გამოიტანა აქციზური მარკები ფინანსთა სამინისტროდან, 24-საათიან რეჟიმში ამუშავა საწარმოები, დაამზადა დიდი რაოდენობით სიგარეტი, გამოიყენა იაფად ნაყიდი მარკები, მაგრამ თამბაქოს ნაწარმი ძვირად გაყიდა, რამაც დიდძალი მოგება მოუტანა. მან პარალელურად ხელოვნურად დააგროვა საგადასახადო ვალდებულებები და დაცვის მექანიზმების შექმნას შეუდგაო.

პოლიტიკოსობა და მედიამფლობელობა

მოგეხსენებათ, ზაზა ოქუაშვილის თანამეცხედრე, ქალბატონი ნატო ჩხეიძე, მეორეგზის პარლამენტარი გახლავთ. "ვარდების რევოლუციამდე" ასლან აბაშიძის "აღორძინების" სიით მოხვდა საკანონმდებლო ორგანოში. ეს არც არის გასაკვირი, ზაზა ოქუაშვილსა და აბაშიძეს წლების განმავლობაში ბიზნეს-პარტნიორები იყვნენ, ადგილობრივ ბაზარზე თამბაქოს ნაწარმის მონოპოლისტის პოზიცია ეკავათ. ზაზა ოქუაშვილმა თავის ბოლო ლონდონურ "აღსარებაში" ბრძანა, ნაციონალებს არასდროს დავუყაჩაღებივარ, ერთობლივად ვმოქმედებდითო. თუ ეს სიმართლეა, გამოდის სააკაშვილ-ოქუაშვილის ტანდემმა ასლან აბაშიძეს, როგორც ძველი თბილისელები იტყოდნენ, "კუკლა" გაუთამაშეს, რომ "ომეგას" ასლანისეული წილიც უშფოთველად მიეთვისებინათ. ისე, თუ მართლაც თავიდანვე "ჩაბრატებულები" არ იყვნენ ეს ორი "პატიოსანი გვამი", ნაცები ოქუაშვილს "ფილიპ მორისის" ნაცვლად რატომ გადაუხდიდნენ იმ 70 მილიონ დოლლარს, რომელზეც "საერთო გაზეთის" წინა ნომერში ვისაუბრეთ? 

სხვათა შორის, სანამ ზაზა ოქუაშვილის მოქმედი ხელისუფლების მხრიდან "დატერორების" ამბავს შევიტყობდით, რასაც ცნობილი აუდიო თუ ვიდეოჩანაწერების გამოქვეყნება და ზაზა-ბატონის მხრიდან ნაციონალების საპრეზიდენტო კანდიდატისადმი ღია მხარდაჭერა მოყვა, ტელეკომპანია "იბერიას" უკვე ეტყობოდა, კოლექტიური ნაცებისადმი "გულგრილი" რომ არ იყო. ყველა თოქ-შოუში, როგორც წესი ჩამომწკრივებულები ყავდათ ხსენებული კონტიგენტის ოდიოზური სახეები, წამყვანები ისეთი მოწიწებით უსვამდნენ კითხვებს და უსმენდნენ, რომ საზოგადოება, განსაკუთრებით ინტერნეტსივრცეში, გაკვირვებას გამოთქვამდა ტელეკომპანიის მფლობელებისა და თანამშრომლების მიმართ, ამათ ამნესია ხომ არ დაემართათ, კარგი, ის არ ადარდებთ ხალხმა რა გადაიტანა ნაცრეჟიმის დროს, ის როგორ დაავიწყდათ თავად როგორ მოექცნენ ნაციონალები, დითირამბებს რომ უმღერიან და განსხვავებული აზრის მქონე რესპოდენტებს ხმის ამოღების საშუალებას არ აძლევენო. აკაკი გოგიჩაიშვილის მეთაურობით, "რუსთავი-2"-ის "ნაღებიც" რომ გამოჩნდა "იბერიის" ეთერში თუ მის მიღმა, აშკარა გახდა, რომ რაღაც ბინძურ თამაშს ჰქონდა ადგილი.

სანდო და კომპეტენტურმა წყაროს ცნობით, ბოლოდროინდელ ამბებს წინ უძღვოდა ე.წ. რეფორმები და გადალაგებები "იბერიაში". გაიხსენეთ რამდენი წამყვანი და ასე ვთქვათ, სახე წავიდა თუ გაუშვეს ტელევიზიიდან, გიორგი გასვიანი, ლალი მოროშკინა, მაკა რაზმაძე და ა.შ. ეს მოვლენები ტელეკომპანიაში ვანო პავლიაშვილის, ანუ ვანიჩქას მისვლის შემდეგ განვითარდა. ვანო პავლიაშვილის ჟურნალისტური `მოღვაწეობის~ ისტორიაში უფრო ღრმად ქექვას არ დავიწყებთ, ახლო წარსულიდან ვიტყვით, რომ ვანიჩქა ჯანსუღ ჩარკვიანის გაზეთის "ქართული სიტყვის" რედაქტორი გახლდათ და პარალელურად, მისი ქალიშვილის, თაკო ჩარკვიანის უახლოესი მეგობარია. როცა ეს გაზეთი დაიხურა, სწორედ ამ ახლად განაციონალებული ქალბატონი თაკოს რეკომენდაციით იქნა მიღებული პავლიაშვილი "იბერიაში". აქედან გამომდინარე, ეს "ობიექტური" ტელევიზია პირდაპირ ვაშაძის საარჩევნო შტაბთან არის მიბმული. როგორც ირკვევა, ოქუაშვილს "საქართველოს ბანკისთვის" დაახლოებით 85 მილიონამდე აქვს გადასახდელი. ასე რომ, ამ კაცისთვის ეს არის ჩვეულებრივი მაქინაციები, ვალების აღება, მერე ვიღაცების გადაგდება რაღაც ინტრიგებით და ა.შ. იგივე ყიფიანიც მინისტრობიდან წასვლის შემდეგ, მასთან ოფიციალურად მუშაობდა, მაგრამ სამი წლის განმავლობაში ოქუაშვილი ხელფასს არ უხდიდა. ბოლოს, როგორც თვითონ ლევან ყიფიანი ამბობს, ოქუაშვილმა უთხრა, თუ გინდა დავალიანება აგინაზღაურო, ახლა ეს ჩანაწერები გავაკეთოთ, ამას არსად წავიღებ, შიდა მოხმარებისთვის გვჭირდებაო. ოქუაშვილს წესიერ ბიზნესი არასდროს უკეთებია, მთელი თავისი "მოღვაწეობის" მანძილზე სულ მაქინაციებში იყო ჩართული. "ქართული ოცნებამ", ოქუაშვილს სააკაშვილის მიერ წართმეული ბიზნესი და ტელეკომპანია "იბერიაც" დაუბრუნა, ამან კი, იმის მაგივრად მადლობა მოეხადა, ახალ ხელისუფლებას აქეთ სთხოვს 25 მილიონს, სააკაშვილმა წამართვა და თქვენ უნდა მომცეთო. დალოცვილო, სააკაშვილმა წაგართვა და" ქართულ ოცნებას" სთხოვ ამ ფულს? ოქუაშვილმა ახლა რა მოიფიქრა, გვარამია-კვესიტაძესთან ინტერვიუში რომ თქვა, ოფშორული კომპანია შევქმენიო, იცრუა, არავითარი ოფშორული კომპანია არ იყო, საქართველოშია რეგისტრირებული. ჩარიცხა იქ ის ვითომდა ვიღაცებისგან მოთხოვნილი ოთხი მილიონი, იმედი ჰქონდა, რომ ბანკიდან ახლადშექმნილ კომპანიას ასე ადვილად ვერ მისცემდნენ ამხელა თანხას, მაგრამ მოხდა გაუთვალისწინებელი რამ. ყველაზე კურიოზული ის არის, რომ ეს თანხა "ომეგას" დირექტორებს საკუთარი ხელით აქვთ გამოტანილი ორ ეტაპად.

ოქუაშვილი ბრძანებს, ეს ფული ვიღაცებმა წაართვესო, ამ "ძარცვა-ყაჩაღობის" შესახებ სხვამ კაციშვილმა არ იცის და ვერცვერავინ ამტკიცებს, რომ მათ ეს ფული ვიღაცამ წაართვა. კაცმა, რომელმაც ამხელა ამები დაგეგმა, თვითონ არ ამბობს ოქუაშვილი მე დავგეგმეო, იმას ვეღარ მოიფიქრებდა, რომ ჩემი თანამშომლები ბანკიდან ამხელა ფულითნ რომ გამოვლენ, შეიძლება ვიღაც დახვდეს და წაართვასო? თუ სხვა რაღაცაში არ იყო საქმე, ასეთი შემთხვევისთვის ხომ გაემზადებოდა, ამდენ ჩანაწერებს თუ აკეთებდა, ერთი ვიდეოკამერის შოვნა გაუჭირდა, რომ ესეც გადაეღო, რატომ არ გადაიღო, თუ გადაიღო, რატომ არ ჩანს სადმე? შეიძლება ისევ ოქუაშვილს მიუტანეს მათ ეს ფული, ვიცით ჩვენ ეს? არ ვიცით!

ვფიქრობთ, ოქუაშვილის მხრიდან სახელმწიფო რეკეტზე საუბარს, სერიოზული პოლიტიკური სარჩული უდევს. ის რასაც ოქუაშვილი ბიზნესძალას ეძახის, ეს არავითარი ბიზნესძალა არ არის, ბიზნესი უბრალოდ მიზეზია, აქ უკვე აშკარად იკვეთება სახელმწიფო შეთქმულების ნიშნები, რომელშიც ის აქტიურ მონაწილეობას იღებს. ეს შეთქმულება მარტო საქართველოში არ დაგეგმილა. სხვათა შორის, კრემლის რუპორად აღიარებულმა "ოპოზიციონერმა" ჟირინოვსკიმ ახლახანს განაცხადა, ნახეთ თუ გრიშა ვაშაძე არ გაიმარ- ჯვებს საპრეზიდენტო არჩევნებშიო. ოქუაშვილი რომ ჩართულია ამ პროცესში, ბევრი მტკიცება არ ჭირდება, სათანადო სამსახურებმა ყურადღებით მოუსმინონ მის ინტერვიუს "რუსთავი-2"-თან და დარწმუნდებიან ამ ინტერვიუმ ფაქტობრივად გვარამია-კვესიტაძის კარნახით ჩაიარა, აშკარად ჩანდა როგორ აქეზებდნენ ოქუაშვილს, რომელმაც მგონი, ისიც არ იცის, რა ჰქვია მისი ხელდასმით გაკეთებულ ჩანაწერებს და აუდიოფირის მაგივრად, აუდიოფილმს ამბობს. მთელ ინტერვიუს გვარამია მართავდა, ოქუაშვილმაც ჟირინოვსკივით, ღიად დაუჭირა მხარი გრიგოლ ვაშაძეს, საიდან ხარ ასე დარწმუნებული "პატივცემულო", ვინ მოგაწოდა ეს ინფორმაცია, იქნებ ჩვენც გაგვიმხილო, რომ 29 ოქტომბრამდე
ვიცხოვროთ...


მანანა სუხიშვილი

მეტის ნახვა
24-10-2018, 13:00


საქართველოს პრემიერმინისტრმა მამუკა ბახტაძემ და თბილისის მერმა კახა კალაძემ „მწვანე ეკონომიკის“ სამოქმედო გეგმის იმპლემენტაციის პირველი ეტაპი "მწვანე პოლიტიკა - ეკონტრანსპორტი" წარადგინეს.

მამუკა ბახტაძის განცხადებით, მთავრობამ გეგმა შეიმუშავა, რომლის მიხედვითაც, შემდეგი 10 წლის განმავლობაში საქართველოში მოქმედი ავტოპარკის 90% ელექტრომობილებით ჩანაცვლდება. 

"ეს არის ძალიან ამბიციური გეგმა, თუმცა, ამავდროულად, ეს გეგმა დიდ უპირატესობას მოუტანს საქართველოს", - განაცხადა ბახტაძემ და დასძინა, რომ საქართველო პირველი ქვეყანა იქნება, რომელიც მოკლე დროში შეცვლის ავტოპარკს ელექტრომობილებით.

მამუკა ბახტაძის თქმით, ელექტრომობილებზე გადართვას დიდი მნიშვნელობა აქვს, რათა ქვეყანაში ეკონომიკური დოვლათი შეიქმნას. 
პრემიერმინისტრის თქმით, შიდა წვისძრავიან მანქანებთან შედარებით მნიშვნელოვანი უპირატესობა ელექტროტრანსპორტს მიეცა. 

"მნიშვნელოვან ფისკალურ სტიმულს მივცემთ ისეთ სალიზინგო სქემების ამუშავებას საქართველოში, რომლის მიხედვითაც მომხმარებელი შეიძენს ელექტროავტომობილს და ფაქტობრივად, იმ ხარჯის ეკონომიით, რასაც მიიღებს საწვავიდან დანაზოგი სახსრების მეშვეობით, 5-წლიან ვადაში გამოისყიდის ავტომობილს, დამატებითი ხარჯების გარეშე", – თქვა მამუკა ბახტაძემ. 

პრეზენტაციაზე ცნობილი გახდა, რომ თბილისში ელექტრომობილების მძღოლებისთვის გარკვეული შეღავათები დაწესდება ზონალური პარკირების საფასურზე, ასევე პარკირების ადგილებზე; იგეგმება ელექტრომობილების სპეციალური დამტენების მონტაჟიც.
პრემიერმინისტრის თქმით, აუცილებელია, განვითარდეს საზოგადოებრივი ტრანსპორტიც. ცნობილი გახდა, რომ 2020 წლიდან თბილისში 200-მდე ელექტროავტობუსი შემოვა.

მამუკა ბახტაძემ თბილისის შემოვლითი რკინიგზის პროექტიც ახსენა, რომელზეც თქვა, რომ პროექტი კონტრპროდუქტიული და რეტროგრადული იყო.

"შემოვლითი რკინიგზის ინფრასტრუქტურას ჩვენ გამოვიყენებთ და ავაშენებთ ახალ მეტროსადგურებს სამგორიდან ლილოს მიმართულებით. ეს არის ძალიან მნიშვნელოვანი პროექტი, რომელიც დამატებით სიცოცხლეს მოიტანს ჩვენს დედაქალაქში.

ამასთან ერთად, მოგეხსენებათ, რომ თბილისის აგლომერაციაც ვითარდება და პერსპექტივაში ეს ხაზი დაგვეხმარება, რომ მომავალში ქალაქი რუსთავიც შესაბამისი ინფრასტრუქტურით მივაბათ თბილისის მეტროს. ეს არის მართლაც ისტორიული მნიშვნელობის პროქტი და მინდა კიდევ ერთხელ ხაზი გავუსვა - ჩვენ ამას არ ვახორციელებთ მხოლოდ იმიტომ, რომ საერთაშორისო ტრენდი ასეთია, რომ ელექტრო ავტომობილები ხდება უფრო და უფრო პოპულარული. დიახ, ის ხდება უფრო და უფრო პოპულარული, მაგრამ ჩვენი ეკონომიკისთვის მას აქვს განსაკუთრებული უპირატესობა - ეს ნიშნავს იმას, რომ რაც უფრო მეტ ელექტრომობილს შემოვიყვანთ საქათველოში დ რაც უფრო სწრაფი ტემპით ჩავანაცვლებთ შიდა წვის ძრავიან ავტომობილებს, უფრო მეტ დოვლათს შევქმნით ჩვენს ქვეყანაში და ეს ნიშნავს იმას, რომ ჩვენი მოქალაქეები იქნებიან უფრო დიდი ქონების მფლობელები. ეს ნიშნავს იმას, რომ საქართველოში განვავითარებთ უფრო ძვირადღირებულ ტურიზმს და საბოლოო ჯამში მოხდება ქართული ეკონომიკის კიდევ უფრო მეტი კაპიტალიზაცია",- თქვა ბახტაძემ.

imedinews.ge



მეტის ნახვა
22-10-2018, 12:30


წინა კვირას, "რუსთავი 2"-ზე კვესიტაძე-გვარამიას მორიგი "შედევრი" ვიხილეთ, რასაც ზაზა ოქუაშვილის ინტერვიუ ერქვა. მსგავსი "საცოდაობა" ჯერ არ მინახავს, ხსენებულმა დუეტმა ამჯერად საკუთარ თავსაც აჯობა. რაც შეეხება ლონდონიდან ჩართულ რესპონდენტს, მის გამოსვლებს "იბერიის" ეთერში იმ პერიოდში ვუყურებდი, როცა ნაციონალები აქტიურად ემზადებოდნენ ოქუაშვილის "გასაკულაკებლად". სიმართლე გითხრათ, არც მაშინ ვყოფილვარ ამ "დიდი" ბიზნესმენის გონებამახვილობა-მჭევრმეტყველებით აღფრთოვანებული, მაგრამ "აქცენტებში" საერთოდ, "რეკორდი" მოხსნა.

მეორე დილას, ეზოში ჩემუბნელი, როგორც თვითონ ამბობს, "კარენოი" ქალაქელი ედიკა შემომეყარა და მეუბნება, მანანაჯან, ამ ზაზას საერთოდ არა სცხვენია? წუხელ ვუსმინე, ეს რეებს ბოდიალობდა ტო. ჟურნალისტი ხო ხარ, ერთი ჰკითხე რა, ზაზაჯან, ცავატანემ, შენ ნამუსი სავსემ ჩუნეს-თქო? ედიკა კარგად იყოს, ჩვენ კი გავიხსენოთ, ვინ არის ზაზა ოქუაშვილი, რომელიც თავისი ბოლო ინტერვიუთი საქართველოს "მხსნელად" მოგვევლინა, თურმე მან უნდა დაიცვას დემოკრატია, სიტყვის თავისუფლება და რაც მთავარია, ალ კაპონეებისგან უნდა გაათავისუფლოს ქვეყანა. მე აუცილებლად ჩამოვალო, ბრძანა ზაზა-"მესიამ", არ ჩამოხვიდე, რამე არ მოგწიონო, "შეშფოთდა" გვარამია, მაგრამ ვერ დაიყოლია. არა, მე აუცილებლად უნდა ჩამოვიდე, ეს რეჟიმი უნდა დავამთავროთო, გაჯიუტდა ზაზა.

ვფიქრობთ, ზაზა ოქუაშვილს შემთხვევით არ გასჩენია ამბიცია, გმირობასა და ქვეყნის მხსნელობაზე, ეტყობა გარკვეულმა ძალებმა დაარწმუნეს, 28 ოქტომბერს ყოველგვარი ეჭვის გარეშე ნაცმოძრაობის საპრეზიდენტო კანდიდატი გრიგოლ ვაშაძე გაიმარჯვებს და შენც უნდა შეიტანო "წვლილი" ამ ამბავშიო. ეჭვი მაქვს, "მარწმუნებლები" მარტო ნაციონალები არ არიან, სხვა წონიანი ფიგურებიც დაიხმარეს, ნაცებს ხომ ეხერხებათ ასეთი რამეები. იმასაც ვეჭვობ, რომ ეს "ფიგურები" ქართველები არ არიან, ბატონი გრიგოლის წარსულს თუ გავიხსენებთ, დიდი ალბათობით რუსები იქნებოდნენ, რომლებმაც ოქუაშვილს "უტყუარი" ინფორმაცია მიაწოდეს, "ზემოთ" ყველაფერი გადაწყვეტილია, ბიძინა ივანიშვილის ხელისუფლება უკვე დამთავრებულია და 28 ოქტომბერს ვაშაძის "გამარჯვებას" ვიზეიმებთო. თანაც პირობა მიუციათ, რომ გამარჯვებისთანავე, მის კომპანიებს ყველა ვალს ჩამოაწერდნენ, შეუქმნიდნენ უაღრესად კომფორტულ პირობებს, მისი ბიზნესი კიდევ უფრო "გაიფურჩქნებოდა" და თავად ზაზას პრემიერ-მინისტრად თუ არა, მინისტრად მაინც დანიშნავდნენ. მის ინტერვიუს ყურადღებით და ობიექტური შემფასებლის თვალით თუ დააკვირდებოთ, აშკარად ჩანდა, რომ ეს კაცი, როგორც თავად კოლექტიური ნაციონალების უმეტესობა, რაღაც თავის გამოგონილ სამყაროში ცხოვრობს. ნაცებს, როგორც ჩანს კარგად ჰქონდათ შესწავლილი მისი პიროვნული თვისებები და არ გაუჭირდებოდათ დაერწმუნებინათ, რომ გმირია, ქვეყანას უნდა უშველოს, სხვა გამოსავალი არ არის, მათი კარნახით უნდა იმოქმედოს. ეს ყველაფერი კარგი, მაგრამ მარტივ ენაზე რა შეიძლება ვუწოდოთ იმ ადამიანს, რომელიც კუდის რიკამდე გაატყავეს ნაციონალებმა, დევნილად აქციეს, ახლა მათ სიყვარულს ეფიცება, ხოლო იმ ხალხს ლანძღავს, ვინც წართმეული დაუბრუნა და ბიზნესის გაგრძელების საშუალება მისცა?! ამის გარკვევაში ზაზა ოქუაშვილის ბიზნეს-წარსული დაგვეხმარება.

არ მკითხოთ, როგორ ვიშოვე პირველი მილიონი

ზაზა ოქუაშვილს შეიძლება "დაავიწყდა", მაგრამ ბევრს ახსოვს როგორ დაიწყო მისი "ბიზნეს-მოღვაწეობა". იყო დრო, ეს ბატონი სიგარეტებით სავსე ცელოფანის პარკებით რომ დარბოდა საბურთალოზე და სავაჭრო ჯიხურებს აბარებდა. როგორც ამბობენ, დამწყები ბიზნესმენის "სამოქმედო არეალი", მიცკევიჩის ქუჩა იყო, სადაც დევნილობამდე ცხოვრობდა ედუარდ შევარდნაძის მიერ ჯერ უშიშროების მინისტრად დანიშნული და შემდეგ №1 ტერორისტად გამოცხადებული იგორ გიორგაძე. სწორედ მან გაუკვალა გზა ოქუაშვილს დიდი ბიზნესისკენო.

სხვათა შორის, იგორ გიორგაძე არც მალავდა, რომ მისი უწყება სიგარეტის კონტრაბანდით იყო დაკავებული, რა ვქნა, სახელმწიფო ხაზინა ცარიელია, ჩემს თანამშრომლებს მშიერს ხომ ვერ დავტოვებო. ცხადია, მინისტრი გიორგაძე მარტო ვერ შეძლებდა "ბიზნესის" გაძღოლას და ოქუაშვილის სახით, საქმეში "სანდო" და "გამოცდილი" კაცი ჩართო. ამ ქართველ "ბიზნესმენებს" კავშირი ჰქონდათ ამერიკულ კომპანია "ფილიპ-მორისის", მოსკოვში მდებარე რეგიონალურ ოფისთან, რომელიც თითქმის მთელ პოსტსაბჭოთა სივრცეს მოიცავდა. სწორედ იგორ გიორგაძეს შეუთავაზებია ამ ოფისისთვის, რომ საქართველოში თავიანთ წარმომადგენლად ზაზა ოქუაშვილი დაენიშნათ. ასევე, გიორგაძემ დააკავშირა ოქუაშვილი ასლან აბაშიძეს და ერთობლივი დიდი ბიზნესი ააწყობინაო. ოქუაშვილის კომპანიის დასახელებაც ("ომეგა"), ალბათ უშიშროების სამინისტროსთან მჭიდრო ურთიერთობებიდან მოდის, თავის დროზე, სწორედ იგორ გიორგაძემ ჩამოაყალიბა სპეცდანიშნულების რაზმები სახელწოდებით "ალფა" და "ომეგა". კომპეტენტური წყაროს ცნობით, გიორგაძის ხალხი იყო ამ აწ უკვე საერთო ბიზნესის კონკურენტებს რომ დაერეოდნენ ხოლმე, ავტომატებით უსაფრდებოდნენ და აყაჩაღებდნენ, იყო საგადასახადო სტრუქტურებში ჩივილი თუ მივარდნები. ოქუაშვილი იგორ გიორგაძის მფარველობით "გულაობდა", ის თავადაც მონაწილეობდა კონკურენტების დარეკეტებაშიო. გიორგაძე კი გააქციეს საქართველოდან, მაგრამ ოქუაშვილის ბიზნესს პრობლემა არ შექმნია, წარმატებით აგრძელებდა თავის საქმეს. ეს არც არის გასაკვირი, გიორგაძე რუსეთს "შეეხიზნა", ასე რომ, არ გაუჭირდებოდა ოქუაშვილის დახმარებოდა, ხოლო ასლან აბაშიძე კვლავ აჭარის ერთპიროვნული მმართველი და ბუნებრივია, არავის დააჩაგვრინებდა ბიზნესპარტნიორს. ბოლო ხანს, ერთ-ერთმა ფეისბუქელმა ზაზა ოქუაშვილს წარსული შეახსენა, ცოლ-ქმარი რომ ამბობთ, ნაციონალების დროს სამართალს მივაღწიეთ, ნაციონალებმა მართალია, ზარალი მოგვაყენეს, მაგრამ რესტრუქტურიზაცია გაკეთდა და აქედან გამომდინარე, როგორ შევადაროთ ერთმანეთს ნაცმოძრაობა და "ქართული ოცნება", ეს უკანასკნელი უარესიაო. შეგახსენებთ, "შავბნელ" 90-იან წლებში როგორ იშოვეთ პირველი მილიონი. გვახსოვს, "ომეგასა" და თამაზ ელიზბარაშვილის "ელიზის" თანაცხოვრების პერიოდი, ამ ორ კომპანიას რომ გქონდათ მონოპოლიზებული სიგარეტის ბიზნესი. მოკლე ხანში, ერთმანეთს დაუპირისპირდით, როდესაც "ომეგა" და "ელიზი" ერთი გუნდი აღარ იყავით, ბაზრის გადანაწილების გამო, სისხლიანი გარჩევები დაიწყეთ, რაც თქვენი კომპანიის გამარჯვებით დასრულდა. მაშინდელ სს-ის საქმეებს რომ გადავხედოთ, უამრავია "ომეგას" მფლობელების წინააღმდეგ აღძრული საქმეები, რომლებიც ბურუსით იყო მოცული და მალევე გაურკვეველ ვითარებაში იფარცხებოდა, იქიდან გამომდინარე, რომ ოქუაშვილმა მფარველად ასლან აბაშიძე გაიჩინა და მისი ბიზნესიც ხელშეუხებელი გახდაო.

ერთი სიტყვით, ზაზა ოქუაშვილი შევარდნაძის მმართველობის დასრულებამდე მშვენივრად გრძნობდა თავს, მის ბიზნესს სასათბურე პირობები ჰქონდა შექმნილი და ყვაოდა. სანდო წყაროს ცნობით, სწორედ იმ დროს იშოვა ზაზა-ბატონმა ძალიან დიდი ფული. აქვე აუცილებლად უნდა ითქვას, რომ "ფილიპ მორისის" რუსეთის რეგიონალური ოფისი ანგარიშს უწევდა რუსულ პოლიტიკურ ინტერესებს, აქედან გამომდინარე, სიგარეტის ბიზნესი ძალზე სერიოზული ბერკეტი იყო რუსეთისთვის, კავკასიის რეგიონში პოლიტიკური ინტერესების გასატარებლად. ასე რომ, ზაზა ოქუაშვილი თავის ახალ "პატრონებთან" ერთად ვინმესკენ ხელს გაიშვერს, რუსეთის ინტერესების გამტარებელია, ჯერ თავის ბიოგრაფიას გადახედოს. მისი სრული "პორტრეტისთვის" უფრო დეტალურად უნდა გავიხსენოთ "ელიზის" დაყაჩაღების ამბავი, რომელზეც ლამის მთელი საქართველო ლაპარაკობდა და მთავარ ფიგურანტად, სწორედ "ომეგას" მესვეურებს თვლიდა. ეს სისხლიანი ანგარიშსწორება კინაღამ ფატალური შედეგით დამთავრდა. როგორც ამბობდნენ, ავტომატის კონდახებით დაუმტვრიეს "ელიზის" თანამშრომლებს ცხვირპირი და პროდუქციაც წაართვეს. იმავე პერიოდში სასტიკად გაუსწორდნენ თავად თამაზ ელიზბარაშვილსაც, რამდენადაც მახსოვს, ის გისოსებს მიღმაც გამოამწყვდიეს. აი, ეს კაცია ოქუაშვილი თავისი "უმწიკვლო" წარსულით, რომელიც დღეს "მაღალ მატერიებზე" გვესაუბრება, ამ წარსულის მქონე კაცი, სახელმწიფო ინტერესების დამცველად და ქვეყნის მხსნელად წარმოგვიჩენს თავს.

მელას თავისი მახრჩობელა მართლა უყვარს?!

სანამ იმაზე ვისაუბრებდეთ, სად და როგორ მოხდ ზაზა ოქუაშვილისა და ნაციონალების "დაძმობილება", გავიხსენოთ, როგორ "გააკულაკეს" ოქუაშვილი "ვარდოსნებმა" და "ყარიბადაც" აქციეს. მიხეილ სააკაშვილმა რა თქმა უნდა, კარგად იცოდა სინამდვილეში ვისი იყო ის რუსების მიერ "დაკრიშული" ბიზნესი, რომელსაც ოქუაშვილის ბიზნესს ეძახდნენ. გასაკვირიც იქნებოდა, არ სცოდნოდა სხვა ყველაფერს რომ თავი დავანებოთ, "კაგებეს" გენერლის დისშვილსა და თავადაც "კაგებეს" ჯარში ნამსახურებ კაცს. სააკაშვილს კატეგორიულად მოუთხოვია "ფილიპ-მორისის" ხელმძღვანელობისთვის, ოქუაშვილი მოაშორეთ, სახელმწიფოს წინააღმდეგ იბრძვის, დავით კეზერაშვილი დავნიშნოთ საქართველოში თქვენს წარმომადგენლადო. მათ უარი უთქვამთ, ოქუაშვილთან ხელშეკრულება გვაქვს გაფორმებული, ეს რომ გავაკეთოთ, ძალიან სერიოზულ ჯარიმას "ავიკიდებთო". ამ "პაექრობაში" უკრაინის მხარეც ჩაერთო, რომელთანაც სააკაშვილს მაშინ ძალიან კარგი ურთიერთობა ჰქონდა. უკრაინელები "ფილიპ მორისის" ხელმძღვანელობას დამუქრებიან, თუ ოქუაშვილის ადგილზე კეზერაშვილს არ დანიშნავთ, სერიოზულ პრობლემებს შეუქმნიდნენ, თქვენ პროდუქციას უკრაინაში არ გავასაღებთო. "ფილიპ მორისი" მაინც უარზე იყო, ძალიან დიდი ჯარიმის გადახდა მომიწევსო, ბოლო ჯამში ეს ამბავი იმით დასრულდა, რომ ოქუაშვილს სააკაშვილმა და მისმა ბანდამ "ფილიპ მორისის" ნაცვლად გადაუხადა 70 მილიონი დოლარი, ოქუაშვილი მეტს ითხოვდა, მაგრამ ეს თანხა მისცესო. ჩვენი წყარო დაზუსტებით ვერ ამბობს, ზუსტად როდის მოხდა ეს "აღებ-მიცემობა", სავარაუდოდ ოქუაშვილისთვის ბიზნესის "ახევამდე" მოხდა. მან ეს ფული აიღო, მაგრამ ჩვევული მეთოდი გამოიყენა (რასაც ახლა აკეთებს) სცადა ბიზნესის შენარჩუნება და სასამართლოში უჩივლა "ფილიპ მორისს", ამიტომაც დასცხო სააკაშვილმა და თავიდან ბოლომდე გაანადგურაო. მოგეხსენებათ, ოქუაშვილი საქართველოდან გაიქცა, მის მთელ ქონებას ნაცმოძრაობა დაეპატრონა, ეს ყველაფერი დავით კეზერაშვილმა გადაიბარა. ინტერნეტსივრცეში გავრცელებული ინფორმაციებს თუ დავუჯერებთ, ოქუაშვილს "ემიგრანტობის" პერიოდშიც გაუგრძელებია საქართველოში "მოღვაწეობა". ნაცხელისუფლების მაშინდელმა მაღალჩინოსანმა ირაკლი ოქრუაშვილმა მას დიდძალი თანხის "ქეშად" გადახდის სანაცვლოდ, მუშაობის უფლება მისცა, მაგრამ რამდენჯერმე კვლავ გახდა ნაცჩინოვნიკების რეკეტის მსხვერპლი, ოღონდ ამჯერად ხმა არ ამოუღია. ოქუაშვილ-ჩხეიძის წყვილი ახლა ათას სისულელეს რომ ლაპარაკობს, იქნებ გვითხრან რატომ "აახია" ერეკლე კოდუამ "ბმვ"-ს მარკის ავტონქანები 40.000 ევროსთან ერთად, როგორ გაეხვივნენ სკანდალში და ჩაფარცხეს დამტვრეული ავტომანქანების საქმეო. ოქუაშვილის კომპანიას, გადაზიდვის დროს დაზიანებული რამდენიმე ავტომანქანა შეუკეთებია და კონვეიერიდან ახლად ჩამოსულის ფასში გაუყიდია. "ომეგას" ერთ-ერთი მენეჯერი თაღლითობის ბრალდებით ყოფილა დაკავებული. ზაზა ოქუაშვილს აქტიური კომუნიკაცია ჰქონია "ქვეყნისხერხემალ" მერაბიშვილთან, "პაბეგში" მყოფი ოქუაშვილი საქართველოში ყველა ჩამოსვლაზე დღიურად დაწესებულ თანხას (50.000 აშშ დოლარი) იხდიდა, ოქუაშვილს სამშობლოში ერთკვირიანი `ვიზიტი~ 350.000 დოლარი უჯდებოდა...

ფულს თუ არ გადაიხდიდა, არ შემოუშვებდნენო. აქვე ერთი ძალზე საგულისხმო დეტალი, როგორც ანონიმი ფეისბუქმომხმარებელი წერს, ის პიროვნება, რომელიც თიბისი ბანკში გადაღებულ ფოტოზე ჩანს, ზაზა ოქუაშვილის თანამშრომელია, რომელიც დამტვრეული ავტომანქანების რეალიზაციასთან დაკავშირებით, თაღლითობის ბრალდებით იქნა გასამართლებული.

ახლა, რაც შეეხება სააკაშვილ-ოქუაშვილის "ჩახუტებას". ჩვენს ხელთ არსებული ინფორმაციით, 2017 წლის დასაწყისში, სავარაუ- დოდ იანვრის თვეში, ზაზა ოქუაშვილი ევროპაში ხვდება "რუსთავი-2"- ის წარმომადგენლებს, ოღონდ არა გვარამიას და სხვა წვრილფეხობას, არამედ ტელეკომპანიის ე.წ. მეპატრონეების ნდობით აღჭურვილ პირებს და სწორედ მაშინ იგეგმება ის "აბსურდის თეატრი", რასაც დღეს ვუყურებთ. როგორ აღმოჩნდა ოქუაშვილი სააკაშვილთან, რომელმაც ფაქტობრივად ყველაფერი წაართვა და დევნილადაც აქცია. ერთია, თვითონ ზაზა ოქუაშვილის მორალურ- ზნეობრივი თვისებები, რაც ემატება "ბიზნესინტერესი" და შურისძიება. მოგეხსენებათ, სააკაშვილსა და კეზერაშვილს შორის კაი ხნის წინ გაირბინა "შავმა კატამ", ეს უკანასკნელი ნაცმოძრაობას აღარ აფინანსებდა, მაგრამ "ეჭვმიტანილი" იქნა, რომ აფინანსებდა "ევროპულ საქართველო. ისე, დღეს ამას დამფინანსებელ-დაფინანსებულები აღარ მალავენ. ოქუაშვილმა ამ შემთხვევით ისარგებლა, მართალია, ორივე კეზერაშვილიც და სააკაშვილიც მისი მტრები იყვნენ, მაგრამ ამ შემთხვევაში მისი და სააკაშვილის ინტერესები ერთმანეთს დაემთხვა, ერთმანეთს ჭირდებოდნენ და მოხდა კიდეც მათიჩაბრატება". ოქუაშვილი ხვდება რუსთავი-2"-ის მესვეურებს და სააკაშვილის უშუალო ხელმძღვანელობით იწერება სცენარი, რა და როგორ უნდა გაკეთდეს. ოქუაშვილს დაევალა ყველაფერი ჩაეწერა, მერე აქედან სხვა მასალას შევქმნით, ოღონდ ეს საპრეზიდენტო არჩევნების დასაწყისამდე დღის სინათლეს ვერ იხილავს, ერთი თვით ადრე გამოქვეყნდებაო.

ოქუაშვილი და კოლექტიური ნაცები ბიძინა ივანიშვილისა და "ქართული ოცნების" დაპირებებზე რომ ქირქილებენ, თუ ამნეზია დაემართათ, ჩვენ გავახსენებთ, ბიძინა ივანიშვილი პრემიერ-მინისტრის რანგში რომ შეხვდა სააკაშვილის რეჟიმის დროს დატერორებულ ბიზნესმენებს და მათ სამართლებრივი თუ ეკონომიკური დახმარება გაუწია. მან უამრავი კომპანიას გამოუყო ფინანსები საკუთარი თანაინვეს- ტირების ფონდიდან, მუშაობა რომ გაეგრძელებინათ, აქედან გამომდინარე ბატონმა ბიძინამ ათასობით ადამიანი იხსნა უმუშევრობისგან.

ის "პატივცემულ" ოქუაშვილსაც შეხვდა, რასაც არც ეს უკანასკნელი არ უარყოფს, ოქუაშვილი თურმე თავზე ნაცარს იყრიდა, ბიზნესმენი კაცი, პოლიტიკაში არ უნდა ჩავრეულიყავი, არც მედიასაშუალება უნდა მქონოდა, რადგან ამის გამო გავხდი დევნის ობიექტიო. ეს ახალი მოდის "ძე-შეცთომილი" თურმე ყველაფერს იფიცებდა, მსგავს შეცდომებს აღარ გავიმეორებო და იხვეწებოდა ბიზნესის წარმოებაში დამეხმარეთო. სარწმუნო წყაროს ცნობით, ბატონმა ბიძინამ მას პირობა მისცა, რომ არაფერი ემუქრებოდა, თუ რაიმე პრობლემა შეექმნებოდა, ნებისმიერ დროს შეხვდებოდა და დაეხმარებოდა. ამ საუბრის შემდეგ, საგადასახადო სამსახური შევიდა ოქუაშვილის კომპანიაში, აღიწერა წარმოება, ყველაფერი გასწორდა, ფინანსთა სამინისტრომ ბევრი რამ აპატია კიდეც, საბოლოო ჯამში, "ომეგა ჯგუფის" რამდენიმე მილიონი ლარი დავალიანებაც ჩამოაწერეს და "განწმენდილებმა" დაიწყეს მუშაობაო.


მანანა სუხიშვილი

მეტის ნახვა
13-10-2018, 09:30


გვესაუბრება ანალიტიკოსი ვაჟა ბერიძე:

_ ბატონო ვაჟა, "ეროვნულმა ბანკმა" კომერციული ბანკებისთვის, მიკრო-საფინანსო ორგანიზაციებისთვის, მოსახლეობაში ჭარბვალიანობასთან დაკავშირებით, ახალი რეგულაციები შემოიღო. რა საფრთხეებზე შეგვიძლია ვისაუბროთ ამ შემთხვევაში?

_ უწინარეს ყოვლისა, არავის უნდა დაავიწყდეს, რომ მთავარი ამოცანა მოსახლეობის კეთილდღეობაა. ჩვენი ეკონომიკის არცთუ სახარბიელო მდგომარეობიდან გამომდინარე, ხალხის დასაქმების პრობლემა სერიოზულია. ამიტომ, მოქალაქეები იძულებულნი არიან სხვადასხვა საფინანსო ორგანიზაციებიდან სესხები აიღონ და ასეთ ვითარებაში, ისინი, ხშირად, არ ითვალისწინებენ საკუთარ გადახდისუნარიანობას. შედეგად, რთულდება პრობლემა, რასაც ჭარბვალიანობა ჰქვია. ამდენად, მთავრობა, "ეროვნული ბანკი" იძულებულნი გახდნენ, ამ მიმართულებით, რეგულაციები შემოეღოთ. ცალსახად უნდა ითქვას, რომ ეს რეგულაციები საჭირო და აუცილებელია იმდენად რამდენადაც მოსახლეობას მომავალში პრობლემებისგან აზღვევს. მაგალითად, როგორ ხდება ახლა? _ ხალხს ბანკში ჩადებული აქვს უძრავი ქონება _ საცხოვრებელი ბინები, ვალებს ვეღარ იხდიან და სახლის დაკარგვა ემუქრებათ. პროცესი რომელიც მიდის _ სესხების გაპრობლემურება, რასაც თან შესაბამისი საფინანსო, სამართლებრივი პროცედურები ახლავს, მოსახლეობას უმძიმეს მდგომარეობაში აგდებს. ერთი მხრივ, ეს რეგულაციები, ამ თვალსაზრისით, კარგი საშუალებაა შემდგომი პაუპერიზაციის _ მოსახლეობის გაღატაკების თავიდან ასარიდებლად. მეორე მხრივ, ამ პრობლემას კრიტიკულად უნდა შევხედო თ. კერძოდ, მთავრობა და ახალი პრემიერი მამუკა ბახტაძე ისე წარმოაჩენენ, თითქოს, ჭარბვალიანობა სიღარიბის სერიოზული განმაპირობებელი და ფაქტორია. თუმცა, მე, არ დავეთანხმებოდი ასე ცალსახად პრობლემის გაშიფვრას. რეალურად, ჭარბვალიანობა კი არ არის სიღარიბის წარმომშობი, არამედ სიღარიბე არის ჭარბვალიანობის განმაპირობებელი. აქედან გამომდინარე, ჩვენ სხვაგვარად ვებრძვით _ შედეგს და არა მიზეზს. ზოგჯერ, საარსებო პრობლემების გადასაჭრელად მოქალაქემ თუნდაც, დროებით, პრობლემის მოსაგვარებლად, საფინანსო ორგანიზაციას უნდა მიმართოს. ამ დროს, თუ მას აღარ ექნება საშუალება, რომ მომავლის იმედით პრობლემა დროებით მაინც მოიგვაროს, მაშინ იგი გამოუვალ მდგომარეობაში აღმოჩნდება, წინა პლანზე წამოიწევს სიღატაკის პრობლემა და შრომისუნარიანი მოსახლეობა ქვეყნიდან რუსეთში, ევროპაში, თურქეთში გაიხიზნება როგორც ეს დღემდე ხდება და დეპოპულაციის პროცესი ანუ, შრომისუნარიანი მოსახლეობის ქვეყნიდან დაცლა კიდევ უფრო გაღრმავდება. საბოლოო ჯამში, ამას შედეგად ქვეყნის და სოციალური პრობლემების კიდევ უფრო მეტად დაბერება მოყვება. ქვეყანაში დარჩებიან მოხუცები და ბავშვები როგორც 90-იან წლებში რაჭის სოფლებში გვქონდა. იქ, ეს ვითარება დღემდე შენარჩუნებულია. ამიტომ, ჭარბვალიანობის თემა და რეგულაციები უნდა განვიხილოთ როგორც საფინანსო-ეკონომიკური პრობლემა და ამასთანავე, ქვეყნის სოციალური სატკივარი. 

_ ამ რეგულაციების შედეგად, აშკარაა, რომ მოსახლეობის დიდი ნაწილი საბანკო მომსახურებით ვერ ისარგებლებს, ვერ აიღებს სესხს და იძულებული გახდება მევახშეს მიმართოს. დროთა განმავლობაში, შეიძლება, მევახშეს თანხა ვეღარ გადაუხადოს და სახეზე კრიმინალური სამყაროს რეანიმაცია მივიღოთ როგორც ეს 90-იან წლებში იყო.

_ ცხადია, მოსახლეობის დიდი ნაწილი ვეღარ ისარგებლებს საბანკო მომსახურებით. ეს გასაგებია, მაგრამ, ამ შემთხვევაში, ჩვენ იმ მოტივით, რომ ვთქვათ, მევახშეობა უფრო მასობრივი გახდება, არ შეიძლება თვალი დავხუჭოთ პრობლემაზე და მიკრო-საფინანსო ორგანიზაციებს საშუალება მივცეთ მოსახლეობა ძარცვოს და შედეგად, სოციალური ფონი კიდევ უფრო დამძიმდეს.

_ მაგრამ რა მნიშვნელობა აქვს მიკრო-საფინანსო ორგანიზაცია გაგვძარცვავს თუ მევახშე?

_ ეს კომპლექსური თემაა და მასშტაბური ხედვიდან გამომდინარე, ცალსახად, მოგვარებული უნდა იყოს. რაც შეეხება მევახშეობას, ამასაც, ასევე, კანონი არეგულირებს. მევახშეობაც აბსოლუტურად ლეგალური უნდა გახდეს, ანუ, ცალკეული პირების მიერ ფულის გასესხება კანონს უნდა დაექვემდებაროს. თუ ადამიანები მაინც გააგრძელებენ დაურეგისტრირებლად, არალეგალურად სესხების მიცემას და მოქალაქეების დაკაბალებას, ამ შემთხვევაში, პასუხისმგებლობა ეკისრება როგორც მევახშეს, ისე მოქალაქეს, რომლებიც არალეგალურ, არასამართლებრივ ურთიერთობაში შედიან ერთმანეთთან. ამიტომ, აქ გამოსავალი ისევ და ისევ კანონის და კონტროლის გამკაცრებაა, რათა სხვა ნეგატიურ მოვლენას ვთქვათ, მევახშეობის მიმართულებით აქცენტის გადატანას, ადგილი არ ჰქონდეს.

_ მოქალაქეს ვინც ვეღარც ბანკიდან აიღებს სესხს და ვერც მევახშეს მიმართვას, რა გზა რჩება?

_ თუ შრომისუნარიანია საზღვარგარეთ ემიგრაცია და იქ სამუშაოს ძებნა. შრომისუუნარო მოსახლეობის მდგომარეობა კი, ვისაც ქვეყნიდან თავის გადასარჩენად გასვლა არ შეეძლება, კიდევ უფრო დამძიმდება. ცალსახად შემიძლია ვთქვა: ადამიანმა სესხი აიღოს იმ შემთხვევაში, როდესაც არ აქვს შესაბამისი შემოსავლები, რითაც ამ სესხს მოემსახურება, გამოსავალი არ არის.

_ თქვენ, თქვით: ხალხი ქვეყნიდან გაიქცევაო. ხომ არ დადგა დრო, ხელისუფლებამ იმოქმედოს იმ მიმართულებით, რომ განვითარდეს ადგილობრივი ეკონომიკა?


_ მიუხედავად იმისა, რომ სხვადასხვა საერთაშორისო რეიტინგული ორგანიზაციების მონაცემებით საქართველო საკმაოდ მაღალ პოზიციას იკავებს ბიზნესის კეთების სიიოლით და ბიზნესგარემოს მდგომარეობით, ეს არსებულ რეალობას სრულად არ ასახავს. თუმცა, გარკვეულწილად, სწორი ტენდენციის მანიშნებელია. ეს აქცენტები უფრო მეტად უნდა დაისვას. აქვე ვიტყვი, რომ ამ ყველაფრის გაკეთება იმ პირობებში, როდესაც ქვეყანა, ფაქტობრივად, საომარ მდგომარეობაშია ჩვენს დიდ მეზობელთან _ რუსეთთან, ადვილი არ არის. არასახარბიელო ეკონომიკური ფონია თავად რუსეთში, თურქეთში, სხვა მეზობელ ქვეყნებში. ისევ და ისევ გაბედული ნაბიჯები, რადიკალური ეკონომიკური რეფორმა, ბევრი მიმართულებით, საშუალებას მოგვცემს ახალი სამუშაო ადგილები შევქმნათ. სხვა შემთხვევაში, ჩვენ, გამოსავალი არ გვაქვს იმიტომ, რომ დასავლური ბიზნესი აღმოსავლეთისკენ ხალისით არ მოდის, ხოლო რუსული კაპიტალის აქტივობას ქვეყანაში, ჩვენი დასავლეთელი, სტრატეგიული პარტნიორები არ მიესალმებიან. 

_ რამდენად არის პრობლემატური საკითხი: ქვეყანაში არ არსებობს საშუალო ფენა, ღარიბ და მდიდარ ფენებს შუა დიდი უფსკრულია. ეს ეკონომიკის განვითარებას ხელს არ უშლის?

_ ამ სიტუაციის შეცვლა ძალიან ძნელი იქნება, რადგან ის, რომ ჩვენ, გვყავს ცოტა მდიდარი და ბევრი ღარიბი, შუა ფენა კი არ არსებობს, ესეც არსებული ეკონომიკური პოლიტიკის შედეგია. ყველა ქვეყანაში, სადაც ეკონომიკური ზრდა დამაიმედებელია, ეს წინსვლა საშუალო ბიზნესის ხარჯზე ხდება. ჩვენთან, როცა ინვესტიციები მოცულობით საკმარისი არ არის, რეგიონში ვითარება საკმაოდ მძიმეა თუნდაც, საბაზრო ეკონომიკის საკმაოდ სერიოზული ხარვეზების შემცველი მდგომარეობიდან გამომდინარე, ძალიან ძნელი იქნება, სოციალური ნარჩენების სტრუქტურა, რაც დღეს გვაქვს, მოკლე ხანში შეიცვალოს. ცოტა მდიდარი ადამიანი რომ გვყავს და ტრანსფორმაციული პერიოდის ეკონომიკა საშუალებას აძლევს ცალკეულ პირებს, ხშირად, უკანონოდაც გამდიდრდნენ, ეს მათი ბრალი არ არის, რადგან ბიზნესი კეთდება ისე როგორც კეთდება. რა თქმა უნდა, ბიზნესი ლეგალურ ჩარჩოებში უნდა ჯდებოდეს, მაგრამ სამწუხაროდ, ამ პროცესის რეგულირება გარდამავალი პერიოდის ეკონომიკის მქონე ქვეყნებში ფერხდება. მაგრამ ჩვენ, ამის გამო, სიღარიბის ფილოსოფიით არ უნდა ვიცხოვროთ. რაც უფრო მეტი მდიდარი იქნება, რაც უფრო მეტი ადამიანი არ დამალავს თავის ქონებას, ანუ, არ გადამალავს საკუთარ მოგებას და ფინანსებს ოფშორებში, საიდანაც მერე, ხშირად, შემოდის როგორც ინვესტიცია, ქვეყნისთვის უკეთესი იქნება. რადგან ასეთ ვითარებაში ადამიანები მდიდრდებიან, საზღვარგარეთ მიდიან და იქ, აკეთებენ ბიზნესს, სადაც უფრო უსაფრთხოდ გრძნობენ თავს. ჩვენი მასის ფსიქოლოგია, რომელსაც მდიდრები სძულს, ზოგჯერ, ქვეყანას დათვურ სამსახურს უწევს. ამიტომ, ჩვენ, ყველანაირად უნდა წავახალისოთ საშუალო და მცირე ბიზნესი, რათა უფრო მეტი ადამიანი დასაქმდეს. თუმცა, ამ მიმართულებით, ჯერჯერობით, ხელშესახები ცოტაა. ისევ და ისევ, ტურიზმის იმედად ვართ. თავისთავად, ეს ძალიან კარგია, მაგრამ როდესაც საქართველოში ტურისტი ჩამოდის და მიირთმევს თურქულ ბოსტნეულს, სომხურ ხილს, აზერბაიჯანულ ნაწარმს და ა.შ. ჩვენ, მხოლოდ მომსახურების სფერო გვრჩება, რაზეც წარმოება მიბმული ვერ არის. ჯერჯერობით, არ ხერხდება რომ იგივე, სოფლის მეურნეობის პროდუქცია _ კიტრი, პომიდორი, კარტოფილი და სხვა ჩვენთან იწარმოებოდეს და ადამიანებს ასაქმებდეს. ასე, რომ ეს პრობლემებიც ერთმანეთთან მჭიდრო კავშირშია და ვიდრე ეს ყველაფერი ეკონომიკური რეფორმების ჭრილში არ იქნება განხილული, ვითარების გაუმჯობესებას არ უნდა ველოდოთ.

თამარ შველიძე

მეტის ნახვა
13-10-2018, 06:30